Footer

Drug personality, napapatay

CABUGAO, Ilocos Sur – Kitkitaen dagiti inbestigador ti anggulo nga adda pakainaigan iti droga ti pannakapapatay ti maysa a drug personality iti national highway a sakup ti Barangay Pug-os ditoy nga ili idi aldaw ti Pebrero 26.

Naideklara nga awanen ti biag ni Ryan Tubon y Tabudlo, 31, naasawaan, nakalista iti kapolisan a drug personality ken residente iti Barangay Pug-os, ditoy nga ili idi maidanon iti Suero General Hospital kalpasan a napaltogan iti national highway a sakup ti Sitio Bessang, Barangay Pug-os idi agarup 11:00 ti aldaw ti Pebrero 26.

Segun iti inisial a panagimbestiga dagiti polis, agpaamianan a direksion ti traysikel a naglugan ni Tubon ken minaneho ni Rexon Dimaya y Yacap, 38, baro, ken kalugaran met laeng ti biktima ket bayat ti panagdaliasatda iti kalsada iti Sitio Bessang, Barangay Pug-os, kellaat lattan a nagparang dagiti suspek ket pinaltoganda dagiti dua.

Nagsagrap ni Tubon kadagiti sugat iti nadumaduma a paset ti bagina a puon ti nakatayanna.

Nasugatan met ni Dimaya iti makannawan a sikona ket naitaray met iti ospital ngem rimmuar met laeng kalpasan ti pannakaagasna.

Naglibas dagiti di nabigbig a suspek iti amianan a direksion.

Nakarekobre dagiti inbestigador iti uppat a kapsula a mapapati a nagtaud iti cal. 45 iti nakapasamakan ti krimen.

Pinakaammuan ti polis-Cabugao dagiti kaparangetda a police stations tapno masatda dagiti kriminal ngem negatibo ti resultana.

Agtultuloy ti panagimbestiga dagiti polis mainaig iti nasao a pammapatay.#