Drug pusher a naaresto iti buy bust operation, naikustodia iti BJMP

CANDON CITY – Naipaima iti Bureau of Jail Management and Penology ditoy ti drug pusher a naipalab-og iti bust operation sadiay Barangay Imus idi malem ti Hunio 20, 2014.

Iti kaudian a report, naipaiman ni Jessie Elefante y Abad, 33, baro, ken residente iti Barangay Olo-Olo Norte, Santiago, Ilocos Sur,m babaen ti commitment order nga inyisio ni Judge Sixto Diompoc ti Regional Trial Court Branch 72, Narvacan, Ilocos Sur.

Sumangsango ni Elefante iti kaso a panaglabsing iti Section 5 ken 11 ti RA 9165 iti babaen ti Criminal Case No. 3802-N ken ken 3201-N a naisaklang maikontra kenkuana iti nasao a korte.

Idi agarup 1:20 timalem ti Hunio 20, nanabtuog ni Elefante iti buy bust operation nga insayangkat dagiti nagtitipon nga elemento ti Santiago Police Station iti panangidaulo ni Senior Inspector Roderick Abenojar Vintero iti babaen ti direkta a superbision ni Senior Supt. Nestor Eswagen Felix, OIC, Ilocos Sur Provincial Police Office ken iti pannakikoordinar ti PDEA Region 1 ken ti ISPPO PAIDSOTIG.

Nakakumpiska dagiti operatiba iti maysa a bassit a heat sealed plastic sachet a naglaon iti mapapati a shabu, 3 dadakkel a plastic sachet a nagkarga iti marihuana, 6 a sag-P500.00 a naaramat a marked money, maysa a Nokia cellphone, ken Honda Wave motorcycle a kolor nangisit ken puraw nga awanan iti plate number.

Sinaksian a mismo pannakainbentario dagiti nakumpiska iti ikut ti suspek.

Nagsasaruno itay nabiit dagiti inwayat ti kapolisan a  panagsukisok ken buy bust operations maikontra kadagiti drug personalities iti probinsia kas panangiyimplimentarda ti naing-inget a kampania maikontra iti maiparparit a droga.#