Drug pusher, nakasuan

STA. MARIA, Ilocos Sur – Dua a kaso ti droga ti impila ti polis ditoy maikontra iti maysa a drug pusher  a natiliw iti buy-bust operation sadiay Poblacion Sur ditoy nga ili idi Septiembre 18.

Nakasuan  iti panagsalungasing iti Section 5 ken 11 ti RA 9165 a naidocket iti babaen ti Criminal Case No. 3668-N ken CC No. 3667 iti Regional Trial Court, Narvacan, Ilocos Sur ni Pepito Mendoza y Tila, 42, naasawaan, construction worker ken residente iti Barangay Lucaban, Burgos, Ilocos Sur.

Awan ti naituding a piansa ti akusado iti immuna a kaso idinto a  P200,000.00 ti piansana iti maikadua a kaso.

Maipalagip nga idi agarup 11:30 ti aldaw ti Septiembre 18, nangisayangkat iti buy-bust operation dagiti nagtitipon nga elemento ti PDEA Ilocos Sur Sector Special Enforcement Team nga indauluan ni Intel Officer 4 Darnel Bacate y Libao ken Sta. Maria police station nga indauluan da SPO3 Joel P. Dasargo babaen ti superbision ni PSI Regino Genoso, Jr., OIC, iti Barangay Poblacion Sur partikular iti provincial road nga agturong iti Burgos, Ilocos Sur a nagresulta iti pannakatiliw ni Mendoza.

Nakakumpiska dagiti polis iti ikut ti suspek ti dua a babassit a heat sealed plastic sachet a naglaon iti mapapati a shabu nga agdagsen iti .02 grams a mapattapatta nga agbalor iti P1,000.00, maysa a Myphone, ken P500.00 a marked money.

Immuna a naipan ti suspek ken dagiti nakumpiska kenkuana iti police station ti Sta. Maria sa impan dagiti agents iti PDEA Regional Office, Camp Diego Silang, Carlatan, San Fernando City, La Union para iti umisu a disposision ti kaso.#