Footer

Drug pusher, nakasuan panaglabsing iti RA 9165

BANTAY, Ilocos Sur – Napilaan iti kaso a panaglabsing iti RA 9165 ti maysa a mapapati a drug pusher iti opisina ti provincial prosecutor, Vigan City itay lawasna.

Maipalagip a pinalab-ogan dagiti nagtitipon nga elemento ti Bantay Municipal Police Station, ISPAIDSOTG, PIB, PDEA, ISSET, CIDT – Ilocos Sur, ken iti pannakikammayet ti PDEA RO1, ni Kenneth Pascua y Parra, 38, balo, residente iti Zone 3, Bantay, Ilocos Sur babaen iti buy bust operation nga insayangkatda iti barangay road a sakup ti Calvario Street, Zone 3, Bantay idi malem ti Hulio 6.
Dagus nga inaresto dagiti polis ni Pascua kalpasan a nakagatang iti heat sealed plastic sachet a nagkarga iti mapapati a shabu ken naiyawat ti nagpammarang a buyer ti marked money a P500.00.

Nakakumpiska pay dagiti polis iti ikut ni Pascua iti maysa nga elongated heat sealed sachet a naglaon iti mapapati a shabu, selpon a Samsung, ken maysa nga improvised lighter.

Naipatuloden iti PNP Crime Laboratory dagiti nakumpiska dagiti polis a mapapati a droga para iti pannakaamirisda.#