Footer

Drug pusher, nanabtuog iti buy-bust operation

STA. MARIA, Ilocos  Sur – Nagpullo ti maysa a mapapati a drug pusher iti naballigi a buy-bust operation nga insayangkat dagiti polis iti pagtaenganna ditoy.

Iti entrapment operation nga insayangkat  ti nagkaysa a puersa ti Philippine Drug Enforcement Agency ken dagiti polis ditoy babaen ti panangidaulo ni P/Sr. Insp. Renato Morales iti pagtaengan ni Danilo Cabreros y Anastacio, 46, residente iti Poblacion ditoy nga ili, nakakumpiskada iti white crystalline substance a mapapati a shabu, maysa a heat-sealed sachet a naglaon iti mapapati a shabu, glass tooter, bamboo stick, 2 a kartib, 5 nga aluminum foil, 2 nga improvised scoop, 3 a disposable lighter, maysa a pakete ti sigarilio nga awan ti naggianna, ken plastic sachet.

Narekobre pay ti search team dagiti marked money a P500, P100 ken uppat a P20 a naaramat iti buy-bust operation.

Naimbitaran iti kuerpo ti polis tapno mapagsaludsodan da Melchor Doming, residente iti Silag, ken Randy Vergara, taga-Laslasong Sur, agpada a barangay daytoy nga ili, gapu iti kaaddada iti pagtaengan ni Cabreros idi naiwayat ti operasion.

Iggem ti bunggoy ti search warrant nga imparuar ni Judge Sixto Diompoc ti Regional Trial Court Branch 72 ti Narvacan idi inwayatda ti operasion.

Naipatulod dagiti nakumpiska a sachet a mapapati a naglaon iti shabu iti police crime laboratory iti San Fernando City para iti pannakaamirisda.