Drug pusher, natiliw iti buy bust operation

SAN JUAN, Ilocos Sur – Nanabtuog ti maysa a drug pusher babaen ti buy bust operation nga insayangkat dagiti nagtitipon nga elemento ti kapolisan sadiay Barangay Immayos ditoy nga ili idi sardam ti Abril 18.

Inaresto dagiti operatiba ni Reynaldo Romero y Padua, 50, naasawaan, drayber, ken residente iti Barangay San Isidro ditoy nga ili kalpasan a naiyawatna iti poseur buyer ti tallo a heat sealed a plastic sachet a nagkarga iti mapapati a shabu.

Iti panagrikisa dagiti polis, nakakumpiskada iti sabali pay nga uppat a plastic sachet a nagkarga iti mapapati a shabu iti bulsa ti short pant ni Romero, kasta met iti maysa a Nokia cellphone ken marked money a P1,000.00.

Sinaksian dagiti barangay officials, DOJ representative ti operasion maikontra ken ni Romero.

Kabayatanna, nakadetenen iti Ilocos Sur Provincial Jail, Barangay Taleb, Bantay, Ilocos Sur ti barangay kagawad a napalab-ogan iti buy bust operation sadiay Barangay Labut Norte, Santa, Ilocos Sur idi malem ti Abril 14.

Napilaan ni Brgy. Kagawad Dominador Advincula y Cachola, 51, naasawaan, iti panaglabsing iti Section 5 ken Section 11 iti RA 9165 ken PD 9 as amended by BP 6 ket nai-docket ti kaso iti babaen ti Criminal Case No. 5378-S.

Maipalagip nga inaresto dagiti nagtitipon nga elemento ti Santa Police Station, ISPAIDSOTG ken PDEA ISSET ni Advincula babaen ti drug bust operation nga inwayatda idi Abril 14.#