Drug pusher, natiliw iti buy bust operation

NARVACAN, Ilocos Sur – Positibo ti buy-bust operation nga insayangkat ti kapolisan ditoy nga ili a nagresulta iti pannakaapput ti maysa a drug pusher iti uneg ti maysa a panganan idi tengnga ti aldaw ti Marso 25.

Nanabtuog iti operasion ti droga nga insayangkat ti kapolisan ti maysa nga agnagan Roger Corrales y Dagdag, aka “Kojak”, 24, baro, mannalon ken residente iti Sitio Palicud Sur, Barangay Sucoc, ditoy nga ili.

Mismo nga iti uneg ti Cindy’s Bakery and Restaurant ti nakaipakatan ti palab-og maikontra iti suspek.

Nakakumpiska dagiti polis iti dua a babassit a transparent heat-sealed plastic sachet a mapapati a naglaon iti shabu, maysa a P500.00 a naaramat a buy bust money ken maysa a Cherry Mobile cellphone nga inaramat ti suspek a transaksion.

Napilaan ni Corrales iti panaglabsing iti Section 5 ken 11 iti Article II ket naiyendorso iti opisina ti provincial prosecutor babaen ti inquest proceedings.

Kabayatanna, naipaima metten iti piskalia iti Candon City dagiti rekord ti kaso a panaglabsing iti RA 9165 maikontra ken ni Virgilio Bisnar, Jr. y Rubang, 41, naasawaan, ken residente iti Barangay Concepcion, Gregorio del Pilar.

Inaresto dagiti polis ni Bisnar babaen ti buy-bust operation nga insayangkatda maikontra iti suspek sadiay Barangay Ayudante, Candon City idi malem ti Marso 18.#