Drug pusher, natiliw iti buy bust operation

BURGOS, Ilocos Sur – Nanabtuog iti ima dagiti nagtitipon a police elements ti maysa a masuspetsa a drug pusher kalpasan a positibo ti insayangkat dagitoy a buy bust operation sadiay Barangay Ambucat ditoy nga ili idi malem ti Hunio 4.
Karaman dagiti nangisayangkat iti operasion ti Ilocos Sur Ilocos Sur Provincial Anti-Illegal Drugs Special Operation Task Group (ISPAIDSOTG) nga indauluan  ni PSI Regino Mendoza Genoso, Jr., Ilocos Sur Sector Special Enforcement Team (ISSET) ti PDEA RO 1 nga indauluan ni IO3 Darnel Libao Bacate, Burgos Police Station nga impanguluan ni PI Lawrence Keith D. Calub ken SPO3 Joel P. Dasargo ti Sta. Maria Police Station.
Inaresto ti grupo ni Wilfredo Viloria y Guerzon, 47, naasawaan, mannalon, ken residente iti Barangay Ambugat, kalpasan a nakakumpiskada iti maysa a heat-sealed a plastic sachet a mapapati a naglaon iti shabu nga agdagsen iti sumurok-kumurong .1 gramo nga agbalor iti P1,180.00 ken ti P500.00 a naaramat a marked money iti naisayangkat a buy bust operation.
Naipan dagiti nakumpiska a banag iti PDEA RO1, Camp Diego Silang, Carlatan, San Fernando City para iti pannakaamirisda.
Naipaiman ti rekord para iti kaso a panagsalungasing iti RA 9165 maikontra ken ni Viloria iti priovincial prosecutor’s office.#