Drug search naisayangkat, positibo ti resulta iti maysa a balay

STA. MARIA, Ilocos Sur – Dua a pagtaengan iti Barangay Maynganay ditoy nga ili ti sinukisok dagiti nagtipon a police elements idi malem ti Pebrero 25 ket positibo ti resulta ti panagsukisok iti maysa kadagitoy.

Nagtitipon dagiti elemento ti  Provincial Anti-Illegal Drug Special Operation Task Group (PAIDSOTG) ISPPO, Provincial Intelligence Branch (PIB), Philippine Drug Enforcement Agency (PDEA) ken Sta. Maria Municipal Police Station nga indauluan da PCInsp. Sosimo R. Racho, I03 Darnel Bacate, ken PSInsp. Andrew P. Rabang, OIC ditoy nga ili, a nangisayangkat idi agarup alas 3:00 ti malem ti Pebrero 25 ti panagsukisok iti balay da Edmar Dasalla y Dela Cruz ken Alfonso Heterosa y Aquino, agpada nga agnaed iti nadakamat a barangay.

Imet dagiti polis ti dua a search warrants a pinirmaan ni Judge Sixto Diompoc ti Regional Trial Court Branch 72, Narvacan, Ilocos Sur a napetsaan iti Pebrero 23, 2012 idi inwayatda ti panagsukisok iti balay da Dasalla ken Heretosa.

Nakumpiska iti balay ni Dasalla ti maysa a transparent heat-sealed plastic sachet a naglaon iti mapapati a napagango a  marijuana buds nga agdagsen iti sumurok kumurang a 3.6 grams a mapattapatta nga agpateg iti P198.00; maysa a Nokia cellphone color black; shabu paraphernalia a pakaibilangan ti 17 transparent plastic sachet nga addaan iti shabu residue; 19 2″x4″ transparent sachet para repacking; 4 disposable lighters; 2 improvised aluminum tooter; 8’3″ long rolled aluminum foil, getteng; crumpled aluminum foils;  1 unit Airsoft Baby Armalite Rifle with marking I.S.A.C.; 3magazine para Airsoft Armalite rifle; 25 pellets para Airsoft Armalite Rifle; 1 Air Pistol a nagmarka iti ARMSCOR nga addaan Serial No. 21986; 4 live ammo para M14 (7.62 MM); 4  nagawangan a kapsula para M16 (5.56 MM); 1 live ammo para M16 (5.56 MM); 1  caliber 45 pistol a namarkaan Para Ordnance, Serial No. QH 4621 a nairehistro iti nagan ni  Ernesto Dasalla Jr., Firearms License No. DO8EA0071002 ken Permit to Carry a nagpaso idi Pebrero 6, 2012; 1 magazine for cal. 45 nga addaan 13 live ammos; 1piece holster ken 19 empty shells para cal. 45.

Negatibo ti resulta iti panagsukisok iti balay ni Heterosa.

Sinaksian dagiti barangay officials nga indauluan ni Barangay Captain Mendrade Mina ken di nainaganan a kameng ti media ti panagsukisok dagiti polis.

Kabayatanna, boluntario nga insuko ni Allen Alex Sesuca y Alcantara, baro, ken residente iti Barangay Sabangan Pinggan, Burgos, Ilocos Sur ti lima a pedaso ti babassit a heat-sealed transparent plastic sachet a naglaon iti mapapati a shabu nga agdagsen iti sumurok kumurang a .6 a mapapati nga agbalor iti P7,080.00.

Nadatngan dagiti polis ni Sesuca iti uneg ti pagtaengan ni Dasalla idi agsukisokda iti balay daytoy.

Naipan dagiti nakumpiska a bambanag iti Crime Laboratory Office, ISPP), Bulag, Bantay, Ilocos Sur para iti pannakaamirisda idinto a maisagsagana ti maikanatad a kaso maikontra ken ni Dasalla.#