Dua a kameng ti Kilusang Larangang Guerrilla Sandino, simmuko

SAN FERNANDO CITY- Dua a kameng ti maysa a grupo ti lokal a terorista a komunista nga agdakdakiwas iti probinsia ti Ilocos Sur ken Abra ti simmuko kadagiti pannakabagi ti linteg iti Plaridel, Bulacan itay nabiit.

Kinuna ni Police Chief Supt. Leopoldo N. Bataoil, PRO-I regional director, a boluntario a simmuko iti nagtipon nga operatiba ti polis ken militar idi malem ti Hunio 29 iti Plaridel, Bulacan  da Samuel Tiw-ak Compalas alias Ka Salvar, Vice-Co of SYP1, PG, Venus  ken nakalista a No. 9 iti Order of Battle (ISO 2nd Quarter 2007), ken Dominador Bangisan Angdos, agpada a kameng iti Kilusang Larangang Guerrilla Sandino nga agdakdakiwas iti maikadua a distrito iti Ilocos Sur ken Abra.

Ni Emmanuel Amolot alias Renato Amolot ti mapapati a dadaulo ti nasao a grupo.

Kinuna ni Bataoil a sumangsango ni Compalas iti kaso a murder a naka-docket iti Criminal Case No. 1978-C iti sala ni Judge Gabino Balbin iti RTC Branch 23 iti Candon City, Ilocos Sur.  

Ni Ka Salvar ti maysa kadagiti suspetsa iti pannakapapatay ni SPO3 Victorino Jallorina.  

Kinuna ni Bataoil a boluntario a simmuko dagiti dua iti nagtipon nga elemento ti NISG- Northern Luzon, PRO1-Regional Intelligence Division, Regional Mobile Group 1, Regional Intelligence Office 1 ken ti Military Intelligence Group 1.

“Boluntarioda nga insuko dagiti armasda ken inkeddengda ti panagsublida iti ikub ti linteg agsipud ta kayatda ti agbiag a normal,” kinuna ni Bataoil.T

 Kinuna ni Bataoil a maikredito ti panagballigi ti operasion iti proyekto ti PRO1 a Project POLBAT ken Bring Home a Comrade Program a kangrunaan a panggepda ti panagballigi iti rupak kontra insurhensia nga awan ti maiputok uray maysa a bala. #