Dua a mangngalap, mapukpukaw

SANTIAGO, Ilocos Sur – Dua a mangngalap ti naireport a mapukpukaw kalpasan a saanda a nagawid manipud idi nagpataawda iti parbangon ti Disiembre 26, 2018.

Inreport ni Barangay Chairman Ruben Elefante ti Barangay Gabao, Santiago, Ilocos Sur idi malem ti Disiembre 27, 2018 kadagiti kameng ti Santiago Police Station a dua a mangngalap a residente ti Brgy. Gabao ken San Roque iti daytoy a munisipio ti nagpataaw pasado alas-singko ti parbangon ti Disiembre 26, 2018, ngem saanda pay a nagsubli.

Iti inbestigasion dagiti polis, naamuan a ti dua a mapukpukaw a mangngalap ket da Nilo Etrata y Lacaden, 36, naasawaan, residente ti Barangay Gabao ken ni Gerald Tadena y Rapada, 41, naasawaan, residente ti Barangay San Roque. Nagpataawda iti baybay babaen iti motorized bangka a napintaan iti stripe nga asul ken puraw ken addaan marka nga Ivan/Ayessa.

Segun kadagiti residente ti Brgy Gabao, napigsa ti angin ken dalluyon idi tiempo a nagpataawda.

Nagpatulong ti Santiago PS kadagiti kabangibang a munisipio iti igid ti baybay ta no adda maisadsad iti sakupda a kabaybayan ket ipakaammoda kadakuada. (TNM)