Dua a motorsiklo, nagsinnapgid

VIGAN CITY – Naginnareglo dagiti dua a motorista tapno saanen a dumanon pay iti korte ti napasamak a panagsinnapgid dagiti luganda idi nabiit.

Iti nasao nga aksidente, nadunor da Reymar Realgo, 17, awanan asawa, ken residente iti Barangay Cabuloan, Sta. Catalina, ken ti di nainaganan a kinasakayna ket naitarayda iti Vigan City Health Office para iti pannakaagas dagiti dunorda.

Segun iti inbestigasion, agpaamianan a direksion ti Honda Wave a minaneho ni Realgo iti P. Gomez Street idinto nga agpadaya met a direksion ti Kawasaki Bajaj a minaneho ni Moises Gadut, 26, ken residente iti Barangay 9 ditoy met laeng siudad ngem mapapati a saan  a nagmenor ti naud-udi iti nagkurusan ti Leona Florentino Street ken ti P. Gomez Street a sakup ti Barangay 4 ditoy siudad a nakaigapuan ti panagsinnapgid dagiti dua a lugan.

Nagsinnurot dagiti nainbolbar iti aksidente kalpasan nga immannugot ni Gadut a mangibaklay iti mabusbos dagiti biktima iti pannakaagasda.#