Dua nga ili, rinegaluan ti Capitol Outreach Program

STA. CATALINA, Ilocos Sur -Rinegaluan ti Capitol Outreach Program ti San Vicente ken daytoy nga ili idi Disiembre 27 ken 28, kas paset ti programa ti gobierno probinsial tapno maiyasideg kadagiti tattao dagiti kasapulanda a mangitunda iti pannakakissay ti panagbisin, malnutrision, ken panangipaay iti kangrunaan a kasapulan ken masapsapul iti pagadalan ken libre a serbisio salun-at.

Siam a barangay ti naregaluan iti Sta. Catalina idinto a pito a barangay ti nasagutan iti San Vicente.

Kabayatanna, agliklikmut metten ti mobile water purifier iti nadumaduma a barbarangay iti umuna ken maikadua a distrito tapno mangipaay iti libre a nadalus a danum a mainum idinto a sabali pay a grupo ti dumandanon tapno mangipaay iti libre a medical/dental mission ken supplemental feeding.

Kinuna ti gobernador nga agtultuloy ti programa agingga a maserbianda ti 768 a barangay iti Ilocos Sur.#