Footer

Dua nga ubbing, dida ginamgam ti napidutda a petaka a naglaon iti kuarta

AGOO, La Union – Adda pay la dagiti nadalus ti panagpuspusona nga ubbing a saan a masulisog iti sileng ti pirak, Virginia.

Da Manuel Ray Santiago, 7, ken Diana Panergo, 8, agpada nga agnaed iti Barangay San Nicolas, Agoo, La Union, ti pammaneknek nga adda pay la nadalus ti panagpuspuso ken panagpampanunotda nga ubbing.

Iti dayta nga aldaw, lumabas koma da Manuel ken Diana iti sanguanan ti museo ti ili ti Agoo idi masaripatpatanda ti maysa a petaka a natangken nga asul ti marisna.

Pinidut dagiti dua ti petaka, saandan a binukitkit a rumbeng laeng nga umuna nga aramiden ti asinoman a makapidut iti petaka ket inderetsoda nga impan iti estasion ti polis.

Iti sukimaten dagiti polis ti petaka, nakigtotda gapu ta naglaon gayam iti nadumaduma a kuarta ti ganggannaet ken nasurok a tallupulo a calling cards a nakailanadan ti nagan ti maysa a foreign nasional, ni Makoto Tubo, temporario nga agnanaed iti Damortis, Sto. Tomas, La Union.

Karaman dagiti foreign currencies ti US$90 (P3,960), 39,000 yen nga aggatad iti P16,017 no maisukat iti pisos wenno kadagupan amin a nakurang a P20,000.

Babaen ti tulong dagiti polis, natuntonan ti akinkukua   ket naisubli kenkuana ti petaka agraman dagiti naggianna a kuarta ken calling cards.

Kasta unay ti panagyaman ni Tubo kada Manuel ken Diana.

Nakarikna met iti panagpannakkel dagiti nagannak dagiti dua nga ubbing gapu iti daytoy pagwadan nga inaramidda a kunada nga agserbi koma a pagtuladan dagiti kapatadanda ditoy La Union.#