sinursuran-banner-sqSinursuranNi Jobert M. Pacnis

Dua a tawen gayamen

Sinursuran: Kolum ni Jobert M. Pacnis
(Umuna iti dua a paset)

KASLA kaano laeng nga agpayso idi maipasngay ‘toy kolumtayo. Pebrero 11, 2013 idi. Ita, dua a tawennan. Dua a tawen metten nga agkakaduatayo. Saan laeng a mapupuotan, aya, ka-Sinursuran?

Alaek daytoy a gundaway tapno makapagyaman kadakayo a nangtartarabay. Ken mangtartarabay latta. Dakayo ti rason no apay nga agtultuloy ti idadanonna iti yanyo, ti pannagnana a linawas.

Idi ibaga kaniak ni Apo Editor/Pabliser (Salvador Espejo wenno Manong Buddy) nga agkolumak, adda panagbadeng ti riknak. Kabaelak ngata? Saanak ngata a makamatan iti oras tapno masustinerko ti aglinawas nga iruruarna? Wen, a, ta kas mannursuro, ammok nga adu ti pakaikumitan iti eskuela. Di bukod ti oras. Uray pay nairanta a para iti pagtaengan, alaen ti pagadalan no dadduma tapno laeng maakem dagiti pagrebbengan ditoy.

Ken maysa, maikariak kadin nga agkolum? Adda kadin umisu a karbengan itoy a banag? Kayatko a sawen, natennebak kadin? Tumutop ngata laeng ti pannakaammok nga agsurat? Ta, ney, maiduma la unay ti sarita ken daniw (a naynay a sursuratek) iti salaysay. Masapul a factual dagiti piesam, dagiti ramen dagiti suratem. Saan a ti la taltalanggutangem. Non-fiction. Maisupadi la unay kadagiti daniw ken sarita a piksion. Mabalinmo ti agparnuay, ti mangbukel iti sabali a lubong. Ti agampayag iti bukodmo nga uniberso.

Sa daytoy: diak ngata nga ipan laeng ti biagko iti risgo? Ta, siempre, adda dagiti masurat a mabalin a makasair. Wenno makasugkar kadagiti addaan iti maikaniwas nga aramid. No makaranaak ngay iti di makalawlaw-kelleb? No makadalapusak iti di-katatawan ti panagpampanunotna? Ayna, baka tumangadak iti barsanga a dina oras! Yad-adayom, Apo…

Ngem nakunak met laeng nga iti naunday metten a panagsursuratko iti salaysay, addadan dagiti nasuratko a mabalin a nakasair iti rikna. Naipalagip la ket ngarud ti pannakaidarumko iti libel gapu iti nasuratko a sarita a naipablaak iti magasin. Wen, sarita laeng dayta ket nakasuanak pay. Piksion. Anianto laengen iti kolum wenno salaysay?

Pagyamyamanak ketdi ta saan a nagballigi daydi a kaso kalpasan a naipalawagko ti side-ko babaen ti counter affidavit. Ngem ketdi, dakkel a taktak ti napasamak. Kinasapulan ti panagabogado. Adu dagiti pappapel nga insubmitar para iti pannakailawlawag ti amin.

Nagliteng pay iti panunotko ti nabasak iti libro. Ti kano pabliser ti numero uno ng agbalin a kalaban ti kolum. Sumken kano kenkuana ti ilem iti kinawaya ti mannurat/kolumnista a maibilang a bisita laeng iti pagiwarnak. Pagangayanna, mabalinna a paisardeng ti panagtaray ti kolum iti ania man nga oras.

Dayta la unay adda di kakinnaawatan ti diak koma kayat a mapasamak. Nasamsam-it ti biag/panagbiag no kakappiam ti amin nga am-ammom.

Ngem simmeksek met laeng iti isipko a saan met siguro a mapasamak ti nasao a senario. Adayo a digo, kas kunada.

Maikadua a mabalin a makalabanko no agkolumak ti gobierno wenno dagiti adda iti gobierno. Adu kadagitoy a panawen dagiti, kas naagapaden, di makalawlaw iti kelleb. Dida kayat ti makritkritikar. Tagidaksenda no madillawda wenno maibutaktak dagiti maikaniwas nga aramidda. Gapu ta agtrabtrabahoak met iti salinong ti gobierno, di a masasaan a maapektaranak. Wenno nalaka laeng a mapadisi no diak makapudno nga agbaribari. Ta adayo pay ti daliasaten sakbay a maawan dayta kababalin a mangtagidakes iti kritisismo. Manmano ti mangibilang kadaytoy kas maysa a nasamay nga addang iti panagbalbaliw para iti pagimbagan ti sapasap.

(Adda tuloyna)