Salaysay: Duog a balbalay a bato iti Vigan City: sibibiag a testamento ti napalabas | Tawid News Magazine - Weekly Ilocos News đź“°

Duog a balbalay a bato iti Vigan City: sibibiag a testamento ti napalabas

Sinurat da Salvador A. Espejo ken Jaime M. Agpalo, Jr.

(Tuloyna)

 

Ipampannakkel ken idaydayaw dagiti Bigueños daytoy a tawidda a mangipakita iti kabibiag ti kaputotanda idi panawen ti Kastila a kas ipaneknek dagiti kadaanan a balbalay iti Heritage Village. Agserbi dagitoy a kas ruangan a serkan nga agturong iti napalabas a kabibiag—lalo idi panawen ti Kastila, ken ti pannakailaksid ti ili iti nakaam-ames a Maikadua a Gubat Sangalubongan.

Ti Vigan ti kapintasan ken kasasayaatan a pakakitaan iti kabibiag idi panawen iti Kastila. Dagiti kadaanan a balbalay iti Heritage Village ti natibong a timek a mangisarita iti kabibiag dagiti umili kadagiti napalpalabas a siglo.

Sipapannakkel ti Vigan ta naaddaan itoy a selebrasion a pangipakitaanna iti saan a magatadan a tawid ken kulturana. Saan laeng a dagiti Bigueños ti maidayaw no di ket amin nga Ilokano.

Ti World Heritage Cities Solidarity Day ita a tawen ket naisangsangayan ta daytoy ti umuna a gundaway a maselebraran iti babaen ti administrasion ni Mayor Juan Carlo Medina a nangsublat iti turay ditoy siudad gapu ta nagturposen ti termino ti inana a ni Mayor Eva. Manamnama a saan laeng nga ituloy ti agkabannuag a mayor dagiti naiyussuat a programa ti turismo ditoy siudad no di pay mairagpin dagiti progresibo a sirmata ken gannuatna para iti ad-adda pay a pannakaitandudo ti turismo ti Vigan City iti saklot ti moderno a panagbiag ken teknolohia a paggargarawan ti lubong iti agdama.

Iti panangselebrar ti Vigan iti World Heritage Cities Solidarity Day 2016, nadumaduma nga aktibidad ti insagana dagiti agtuturay ti Vigan iti panangidaulo Mayor Medina a mangitandudo iti nabursi a napalabas a naglabasan daytoy a siudad.

Mataldiapan dagiti sangsangaili dagiti naglasatan ti Vigan iti napalabas babaen ti Repazzo de Vigan a maangay inton Septiembre 9:  ti pannakaiparang ti kabibiag dagiti taga-Vigan manipud idi panawen a maysa laeng a pagpunduan dagiti negosiante nga Intsik tapno imaroda dagiti tagilakoda a maisukat kadagiti produkto dagiti natibo; ti pannakaipasdek ti Villa Fernandina de Vigan nga encomienda ni Don Juan de Salcedo kas gunggonana iti panangsakupna iti daytoy a lugar, ti pannakaiyalis iti Vigan ti tugaw ti dioses manipud iti Lallo, Cagayan, ti yaay dagiti Amerikano, panangsakup dagiti Sakang daytoy nga ili idi Maikadua a Gubat ti Lubong, ti panaglupos ti Vigan manipud iti maikapat laeng a klase a munisipalidad agingga iti nagbalin a siudad a maysa itan kadagiti kangrunaan a destinasion dagiti turista iti Amianan a Luzon.

Dagiti dadduma pay nga aktibidad kas paset ti selebrasion:

Septiembre 5: maluktan ti Solidarity Festival, Food and Trade Fair a maangay iti amianan ti  Vigan City Convention Center a pakaidasaran kadagiti makan a kas iti bagnet, longganisa ken dadduma pay a maipagpannakkel a delicacy daytoy a siudad kasta met dagiti mailako a kayo a tugaw, aparador, sopa, ken dadduma a nadisenio a muebles.

Maluktanto met iti daytoy nga aldaw ti “Monochrome Connection” Art Exhibit babaen ti University of Northern Philippines College of Fine Arts a maangay iti Vigan City Hall Legislative Building;

Septiembre 6: maluktan ti sabali pay nga exhibit, ti Fotografias y Recuerdos a maangay iti Vigan Culture and Trade Center. Sabali laeng ti Historia Oral a maaramid met laeng iti nasao a pasdek.

Iti rabii daytoy a petsa, maangay ti salip iti folkdance ken addanto pay mabuya a sarsuela iti Plaza Burgos.

Septiembre 7: maangay iti Plaza Burgos ti salip iti Sabayang Pagbigkas ken Dancesport Competition a pagsasalipan dagiti mangisursuro iti elementaria.

Septiembre 8: makipartisipar dagiti agtuturay ken dagiti empleado ti siudad iti Eucharistic Celebration ken Renewal of Pledge to Heritage Conservation a maaramid iti St. Paul Cathedral of Vigan, sa ti Solidarity breakfast iti Plaza Burgos. Iti karabianna, addanto puppetry ken dancesport competitions iti met laeng Plaza Burgos.

Septiembre 9: tampok a pabuya iti alas tres ti malem ti parada a Repazzo de Vigan a pakailagalagaan ti namirit a pakasaritaan ti Vigan; idinto a nadumaduma a pasalip ti maangay iti Plaza Burgos  kas iti kinnantaan, a pakaibilangan ti vocal chorus, vocal solo, vocal duet, daniw, ken dallot.

Iti maudi nga aldaw, Septiembre 10, ti pannakaiyawat ti gunggona kadagiti nangabak a maiballaballaet iti maysa a cultural show sadiay Plaza Burgos.#