DV, nagmula iti marunggay iti eksklusibo a village

CABUGAO, Ilocos Sur – Kas panangipromotna iti nutrision iti salun-at, nagitugkel ni Vice Gov. Deogracias Victor Savellano kadagiti sanga ti marunggay iti solar ti katuganganna iti maysa nga eksklusibo a village iti Metro Manila.

Segun ken ni Savellano, idi damo sinitar dagiti kaarruba no ania dagiti itugtugkelda ngem  ita ta agsaringitda, maayatandan agsipud ta addanton dumawatanda iti nasustansia a bulong a mailaok iti tinola a manok wenno dinengdeng.

Kinuna ti bise gobernador a masayangan ngamin idi iti tiempona a matutudo ken adda pay met la pagmulaan isu a nagimulada iti marunggay.

Impalgak ti bise gobernador a nasurok a sangagasut a kapuon ti marungay ti naimulada iti solar.

Innayonna a bassit a banag ti inaramidna ngem dakkel ti kaipapananna.#