Dyip, natnag iti derraas; 3 natay, 3 nasugatan

NARVACAN, Ilocos Sur – Tallo a tao a pakairamanan ti drayber ti natay idi natnag ti dyip a luganda iti derraas iti salogan a paset ti Sitio Kakaldingan, Barangay Lungog, ditoy nga ili idi malem ti Oktubre 18.

Naireport a dead on arrival iti Central Ilocos Sur District Hospital a nakaitarayanda da Tranquilino Gamiao, Jr. y Ancheta, 52, naasawaan, security guard iti Holy Spirit Academy-Laoag City, nagmaneho iti dyip, Danilo Rivera y Dumlao, naasawaan, security guard ken residente iti 24 Nagrebcan, San Nicolas, ken Bernarditas Duerte y Tejero, 57, naasawaan, ken residente iti Barangay 20, Pasay St., Laoag City.

Nasugatan met dagiti sabali pay a naglugan iti dyip a nabigbig a da Alfredo Madriaga Jr. y Padre, 47, naasawaan, security guard ken residente iti Brgy. Naiporta, Sarrat; Dennis Pascual y Manuel, 40, married, utility worker ken residente iti Brgy. 24, Emilio Jacinto St., Laoag City ken ti anak ni Bernarditas a ni Fatima Duerte y Tejero, 18, balasang, ken residente iti Brgy. 20, Pasay St., Laoag City.

Segun iti report, agsalsalog ti dyip nga agpaabagatan a laud a direksion ket mapapati a saan a nakarkulo ti drayber ti nakaro a kurba ket napukawna ti kontrolna iti manibela a puon ti nakadungparanna iti kongkreto a railings sa natinnag iti derraas a mapattapatta a 50 metros ti kaunegna.

Kagapgapu ti grupo iti pamunpon sadiay Tayum, Abra ket aggawiddan idi mapasamak ti aksidente.#