Footer

Dyip, natnag iti derraas, 4 natay, 12 nasugatan

SUYO, Ilocos Sur – Uppat ti natay idinto a  12 ti nasugatan a pasahero idi natnag ti naglugananda a dyip iti derraas iti maysa a sitio ditoy nga ili idi bigat ti Hunio 28.

Segun iti report manipud iti polis ditoy nga ili, awanen ti biag da Racquel Elpa, Ending Pucnid, Charlene Sicayod ken Loreta Macgalo, agpapada a residente iti Sitio Batiangan, Barangay Uso, Suyo, Ilocos Sur a naidanon iti Tagudin General Hospital. (Iti kaudian a report, 6 ti natayen iti aksidente. Saan pay a nakumpirma ti nagan dagiti dua a natay a naiyaon iti derraas a nakatinnagan ti lugan. – Ed)

Nainaganan met dagiti nasugatan a da Elton John Macgalo y Bangangao, 12; Caridad Bangsalud y Lang-ay, 50, naasawaan; Emilia Sicayod y Lang-ay, 56, naasawaan; Carmen Balawen, 47; Rowena Saydoquen y Sagandoy, 32; Carmen Balawen y Bitong, 47, naasawaan; Salvador Baglao y Marie, 60, naasawaan; Rico Pongsila y Cepian, 16, baro; Rheafe Sad-und y Abbel, 12; Rachelle Elpa y Lopez, 17; Gina Pucnid y Visaya; Lolita Aquistoy y Uluan, 48, naasawaan; ken Lorita Macgalo y Bapor, 35, naasawaan, agpapada amin a  residente iti Sitio Batiangan, Barangay Uso, Suyo, Ilocos Sur.

Saan a naan-ano ti drayber ti owner-type jeep a nainaganan nga Argie Hermosa y Laguiden, 24, residente met laeng iti nadakamat a sitio.

Kinuna ni Police Inspector Pedro Barbado, hepe ti polis ditoy, a naigalis ti lugan bayat ti panagsalogna iti nadakamat a barangay a puon ti nakatnaganna iti agarup 60 a metro ti kaunegna a derraas. Mapapati a napitak ti kalsada gapu iti panagtudona.

Addan ti drayber iti kustodia ti polis ditoy.#