sinursuran-banner-sqSinursuranNi Jobert M. Pacnis

E, Di Wow!

Sinursuran: Kolum ni Jobert M. Pacnis
(Maudi iti dua a paset)

Reflection journal iti subject-ko kadagiti ubbing: Iti umuna nga eksam, ababa ti naala ti estudiante. Ket iti bondpaper a nangipigketanna iti score-na, insuratna (kas reflection) sadiay a masapul nga agbasa a naimbag tapno ngumato daytoy iti sumaruno. Nagadu nga insursuratna tapno makapag-review a naimbag.
Ngimmato nga agpayso iti simmaruno nga eksammi. Kas iti sigud, ipigketna ti papelna iti bondpaper tapno isuratanna iti reflection iti baba. Kastoy ketdin ti insuratna: E, di wow!

E, di wow! laeng ti reflection-na. No utoben a naimbag, kasla awan laeng kenkuana.

Iti daytoy a pasamak, di napanunot ti ubing ti mabalin a gradona. E, di wow! Ababa a balikas ngem isu ti nangirubo iti gradona. Ta no ut-utoben, kasla awan kaes-eskan kenkuana ti resulta ti eksam. Yanaraar daytoy ti adda nga ugalina, ti aw-awidna, wenno ti sibubukel a kinataona.

E, di wow! Balikas a nakalatlatak ita. Ngem iti panaglabas ti panawen, agnadnad met laeng kas kadagiti immuna a naglatak . Mayarig iti asuk a pukawen laeng ti angin. Kayarigan ti tao a nagbiag nga awan kaes-eskanna, a nagbalin a nakakatkatawa laeng gapu kadagiti aramidna. Nga iti panagpakadana ditoy a lubong, awan man laeng ti nakallalagip kenkuana.

Ta kasta ti agus dagiti mapaglatlatak nga arkos ti dila ita— sao-ti-kalye, jejemon, kdpy.

Ngem kas nasaon, makaparnuay daytoy iti sugat. Dagitoy koma a sugat, saanen nga umadu pay. Saanen a kumaro pay. Saanen nga agkaimpeksion tapno nalaklaka ti panaglunit, ti panagimbag. Saan koman a dumanon iti punto a dadaelenna dagiti tinagtagibi a relasion.

E, di wow! Mabalin a makapalag-an iti komunikasion kadagiti agaammon. Mas “at ease” ti rikna ti tunggal maysa. Maus-usar met kadagiti jokes, wenno nakakatkatawa a banag ken situasion. Pangikkat iti stress!

E, di wow! Apay a di usaren ngarud iti positibo a banag?

Umayka, agdalusta iti kuarto.

E, di wow!

Mabalin pay a kastoy:

Naglaingka iti Math! Tuladenka man met.

E, di wow! ‘Nagsayaaten, classmate!

Daytoy pay:

Apay a kaykayatannaka dagiti titsertayo?

Simple laeng, classmate. Agbalinka a manakem ken mapagpiaran.

Gesdak ngaruden ti kinapasawayko.

E, di wow! Dayta ti kasapulan ti pagadalantayo. Mapaneknekam ita a saan a parikut dagiti nagkaadu a pagannurotan a masapul a suroten. Adda laeng dayta iti disiplina iti bagi. Basta agsingsingpetka, awan panunotem a fines…

Pudno la unay nga adu a situasion iti biagtayo a mausartayo iti positibo a banag dagitoy agruruar ita nga arkos ti dila. Datayo ti rummbeng a mangmanehar kadagitoy. Kas iti pirak, saantayo nga ipalubos a dagitoy ti mangtengngel kadatayo. Saantayo a baybay-an a patayyeken, daleben ken ikarangukong dagitoy nga ekspresion. Datayo ti rumbeng a boss-da.

Isu a kadagiti estudiante, agbalin a masirib. Panunoten no kaano a yibbet dagiti arkos ti dila. Saan nga agdardarasudos.

Kas met laeng daytoy iti panagpili ti karelasion. No dinadaras, awan papananna no di panagsina met laeng.

Ita, no iti panagkunam ket nakaibatiak iti sangkamaregmeg nga adal, ti laeng makunak: E, di wow! Agyamanak. Agyamanak iti oras a tinugawam a binasa daytoy nga artikulo.

Urayem ti sumaruno a suratek?

E, di wow! Kitakits ngarud iti sumaruno nga isyu.

Inton agbalbaliw metten dagiti agtuturaytayo, uray saanton nga uso daytoy nga arkos ti dila, kunaekto:

E, di wow! nakalbit met laeng ti riknada.#