sinursuran-banner-sqSinursuranNi Jobert M. Pacnis

E, Di Wow!

Sinursuran:  Kolum ni Jobert M. Pacnis

(Umuna iti dua a paset)

 

Nakapasaka iti eksammo?

Wen. Apay?

E, di wow!

Nadadaelko ‘diay tawa, kunam?

E, di wow!

E, di wow! Maysa a nalatak nga ekspresion ita dagiti ubbing ken agtutubo a namunganay kadagiti idoloda nga artista iti telebision. Kas pammaneknek, iti tunggal patangan, tsismisan wenno normal a pannakisaritada kadagiti adda iti aglawlawda, masaoda la a masao dayta. Nagbalinen a pannakaarkos ti dilada.

Iti pagadalan,  normal metten dagitoy a situasion:

“Nalpasmon ‘tay project-tayo? Asidegen ti deadline. Baka mabagsakta no saanta nga agipasa.”

“E, di wow!”

Atoy pay:

“Break gayamen da Meliza ken J-son”

E, di wow!”

Ti yanna nga adat:

“Absent ni ma’am. Agtrangkaso kano…”

“E, di wow!”

“Nagsigarilioak itay ‘diay likud ti room-tayo.”

“E, di wow!”

“Ag-cutting classes-ta.”

“E, di wow!”

Adayon ti nagteng daytoy nga arkos ti dila dagiti ubbing ken agtutubo. Kas met laeng iti maysa pay, ti Boom Panes! Awan met ketdi ti dakes ti pannakiuso kadagitoy baro a lengguahe nga agruruar ita. Paset dayta ti panagdur-as ti lengguahe; ti panagdur-as ti aspeto-sosial iti panagbiagtayo.

Laeng, no maminsan, wenno kanayon sa pay ketdi, saan a timtimbangen dagiti ubbing ken agtutubo ti ar-aramidenda. (Kas met laeng kadagiti agturay ita a kasda la ubbing no agpipinniltakda.). Dida pampanunoten no kaano, kasano ti umno a panangisawang iti arkos ti dilada tapno nasayud ti panagsaadna kadagiti makangngeg wenno pangibagbagaanda. Inton agbalawda, nakasugatda gayamen iti rikna dagiti kabagian, gagayyem wenno am-ammoda.

Isu a nagpateg la unay ti pannakaitukit iti isip dagitoy nga agtutubo ti kaadda koma ti nauneg a panangimutektekda iti ania man nga aramiden ken isawangda. Wenno iti ania man nga aramatenda tapno laeng makuna a dida maudi iti uso.

Kunada ngarud a narigaten nga ibabawi ti ania man a naisawang. No nakaigapuan daytoy iti pannakadadael ti relasion iti am-ammo, sigurado a mapugsat dayta linas ti panaggagayyem—relasion, kinnayammet a napaut a tinartaripato ngem madadael laeng iti apagkirem. Ken panagkakabagian— ti nagrigat a panunoten a pasetna. Ta manon, aya, ti saan nga agpipinnaguni nga agkakabagian gapu laeng iti naisawang ti maysa a kameng ti kaamaanda?

Ti pannakaritur ngarud daytoy a biddut ket dakkel nga akem iti ima dagiti mannursuro, siempre, iti pannakibadang dagiti nagannak. Maysa laeng a simple nga arkos ti dila dayta, mabalin a sawen dagiti dadduma. Saanen a pagibusan pay iti oras!

Ngem no imutektekan a naimbag, kas nasaon, nakadakdakkel a parikut ti ibungana no di mausar a nasayaat.

“Bimmagsakak iti eksamtayo, klasmeyt.”

“E, di wow!”

Iti ayat nga adda iti uso, iti panagkuna a di serioso ti saritaan, maisawang dayta nga arkos ti dila. Ngem mangukrit gayam iti nauneg a sugat. Ta kasla ketdin pakaragsakan pay ti pannakabagsak ti kaklase iti eksam no kasta ti isungbat. Awanan pannakisimpatia!

Isu nga iti puso ken isip, iti sibubukel a kinatao, ti bimmagsak nga estudiante, maparnuay ti sugat, agnunog, agwaras ti ut-ot ket no di mataraken, agbanag iti awan ti nabayag a panaggayyem. Mapanunot a dika a pudpudno a gayyem no kasta ketdin ti ibagbagam.

(Adda tuloyna)