Footer

Earthquake drill, naisayangkat iti DWCV

VIGAN CITY – Tapno maammuan no kasano kasagana dagiti estudiante no sumangbay ti didigra, nangisayangkat itay Oktubre 16 ti Provincial Disaster Cordinating Council (PDCC), Philippine National Red Cross ken Provincial Social Welfare and Development Office iti earthquake drill iti Divine Word College of Vigan (DWCV) Elementary ken High school Department.

Segun ken ni Gov. Deogracias Victor “DV”  Savellano, agpapaay a chairman ti PDCC, rumbeng a saganaan dagiti saan a mapakpakadaan a pasamak kas iti ginggined tapno awan ti madangran wenno matay no bilang man dayyegen ti kastoy a kalamidad ti probinsia.

“Saan a rumbeng nga adda maibuis a biag aglalo kadagiti ubbing iti panawen ti didigra. Ngarud, kasapulan ti naan-anay a panagsanay tapno ammoda ti aramidenda no bilang adda sumangbay a kalamidad,” palawag ti gobernador a mismo a nagobserbar bayat ti drill.

Naragsakan met ni  Ma. Julia Amigable, mangidadaulo iti Philippine National Red Cross Vigan, iti nakitana a performance dagiti nakipartisipar nga estudiante. Sinaggaysana nga inikkan iti grado dagiti nadumaduma a paset ti panagsanay kas iti alarm phase, response phase, assembly phase, head count phase ken evacuation phase. Nangted pay ni Amigable iti pointers kadagiti ubbing tapno mapapigsada dagiti aspeto ti drill a nagkamtudanda.

“Masapul ti kaadda dagiti estudiante nga agserbi kas first aiders. Addaan koma dagitoy iti first aid kits tapno iti aktual a didigra, makaisalbarda iti biag sakbay a sumangpet dagiti taga DOH ken PNRC,” kinuna ni Amigable idinto nga innayonna a saan a malapdan nga adda dagiti masugatan, matalimudaw, mablo, maatake, wenno agbalin a biktima ti stampede iti panawen ti didigra.#