Earthquake, fire drill, naisayangkat

SAN JUAN, Ilocos Sur – Nangiwayat ti Bureau of Fire Protection iti earthquake and fire drill kadagiti nadumaduma a pagadalan ditoy nga ili kas paset ti disaster preparedness dagiti umili no adda dumteng a didigra.

Kinuna ni BFP Fire Marshall Erwin Saludes nga immuna nga inyadalda ti earthquake and fire drill kadagiti agbasbasa iti sekundaria sada insaruno kadagiti elementary pupils ditoy nga ili.

Kinuna ni Saludez a malaksid iti lektiur, inyadalda pay ti aktual nga aramiden dagiti agbasbasa no adda mapasamak a ginggined, layus wenno uram.

Innayon ti fire marshall a tapno nasamsamay a maipaganetgetda ti kinapateg ti earthquake and fire drill, pinuntiriada dagiti agbasbasa kadagiti nadumaduma a pagadalan tapno isudanto metten ti mangiyadal ti nasursuroda nga aramiden no adda dumteng a didigra, kas iti ginggined, layus wenno uram kadagiti pamiliada.#