EDITORIAL: 3 million ti saan a rehistrado a naiyanak nga ubbing iti Pilipinas!

Makamurareg ti nabasami a damag nga agdagup iti tallo million dagiti ubbing a saan a nairehistro idi naiyanakda. Saan a mabalin nga ibarengbareng daytoy nga inlatak ti maysa nga advocacy group a maaw-awagan iti Plan International in the Philippines.

Apay a nasken a mairehistro ti maysa nga ubing apaman a maiyanak?

Napateg, kuna ti Plan International Philippines, agsipud ta maysa a kritikal a pagteng iti biag ti pannakairehistro ti maysa nga ubing no mayanak ta daytoy ti mamagbalin wenno mangtukkol iti masakbayanna.

Agasem, no saan a nairehistro ti ubing idi naiyanak, awan ngarud ti maited kenkuana a birth certificate. No awan ti maiparangna a birth certificate, adu dagiti kalinteganna a maipaidam kenkuana, kas koma iti kalintegan a legal, ekonomikal ken sosial kas iti kalintegan a maipaayan iti health care, edukasion ken proteksion.

No saanda a rehistrado, kayarigan dagitoy ti “saan a makita” nga ubbing, ket isuda dagiti nangnangruna nga agbalin a biktima iti child trafficking, puersado a panagtrabaho, pannakaabuso ken pannakagundaway.

Narigat a maawatan no apay a nagbalin a kasta kadakkel ti bilang dagiti saan a rehistrado nga ubbing iti pagilian. Dakkel a panagliway daytoy ti gobierno a rumbeng koma a mangsalaknib iti umilina nangruna dagiti nalupoy ken awanan gaway nga ubing.

Kasapulan ngarud a mangiyimplementar ti gobiernotayo iti naing-inget pay a pannakairehistro ti ubing apaman a maiyanak.

Maaramidna daytoy babaen ti tulong ti napigpigsa a sistema ti rehistrasion kadagiti barangay ken lokal a civil registry office iti ili wenno siudad.

Kapatgan unay, maipababa koma ti mabusbos iti pannakairehistro dagiti mayanak nangruna kadagiti lugar a nangato ti insidente ti kinapanglaw.

Nabilbileg no maipaawat kadagiti umili, nangruna dagiti nagannak ti kinapateg ti pannakairehistro ti ubing no maiyanak.#