Footer

EDITORIAL: 4Ps, arigna band aid a temporario a mangep-ep iti saem ti sugat

Maysa kadagiti ipagpannakkel ti Aquino government a programa ti Pantawid Pamilyang Pilipino Program wenno 4Ps a pangidur-as iti panagbiag dagiti marigrigat a pamilia iti pagilian.

Babaen daytoy a programa a maaw-awagan pay iti Conditional Cash Transfer (CCT), adda dagiti mapili a benepisario a pamilia nga umawat kababaan ti P500.00 agingga iti maximum a P1,400.00 tunggal bulan kas education grant para iti maximum a tallo nga annak. Maikkan dagiti ubbing iti sag-P300 tunggal bulan nga abasto no la ketdi agtawenda manipud iti 6 agingga iti 14. Saandanton a maikkan iti abasto apaman a madanonda ti 15 a tawen.

Ita, babaen ti naikalawa a sakupen ti 4Ps, maituloy a maikkan iti abasto dagiti annak dagiti benepisario nga agtawen iti manipud 14 agingga iti 18 iti panagbasada iti high school ken kolehio.

Iti umuna a panagkita, napintas daytoy a programa ti gobierno nasional agsipud ta matulongan dagiti marigrigat a pamilia a mangisakad iti panagadal dagiti annakda tapno maaddaanda iti diploma nga agbalin a kalasagda iti pannakibakalda iti biag. Ti saludsod: maragragpat kadi daytoy a programa ti nakaisangratanna a panggep?

Ngem kadagiti kritiko, saan a daytoy ti sungbat iti problema ti kinapanglaw a manglenglengnges kadagiti adu a pamilia iti pagilian. Dinakamatda dagiti naiparuar a surbey nga agtultuloy latta ti yaadu dagiti mabisin a Filipino iti baet dagiti rinibribu a marigrigat a pamilia a benepisario iti daytoy a programa.

Kadagiti kritiko, maysa ketdi a cash dole-out ti nasao a programa ket maipaugali laeng kadagiti benepisario ti panagdependeda lattan iti abasto nga awatenda iti binulan manipud iti gobierno. Pinaltuad pay daytoy a programa ti panagbalin a sadut dagiti benepisario, ta imbes nga agsapulda iti pagpakanda kadagiti pamiliada, saklotenda lattan ti tianda agsipud ta adda namnamaenda nga awatenda iti binulan.

Kasano a maipasagepsep kadagiti annak ti pateg ti panagtrabaho no makitada dagiti nagannak kadakuada nga agdepdepende lattan iti dole-out manipud iti CCT?

Iti biangmi, napintas ti intension ti nasao a programa, ngem saan a solusion daytoy iti pannakalapped iti kinapanglaw agsipud ta parnuayenna laeng dagiti pamilia a sadut, agpampannuray lattan iti kaasi wenno dole-out manipud iti gobierno.

Saan a magun-od babaen ti CCT ti solusion iti parikut iti edukasion no di babaen ti panangilatang iti dakdakkel a pondo para iti DepEd nga agtinawen nga agproblema iti kakurang dagiti kuarto, libro, tugaw ken pangsueldo kadagiti kanayonan a bilang dagiti mangisursuro maigapu iti agtultuloy a yaadu dagiti agbasa.

Ti ketdi koma pangipaayan ti gobierno iti naan-anay nga imatang ti panangitedna iti nalablabon a panggedan kadagiti umili. No adda panggedan ti ama ken ti ina, saanda a problema ti pangalaanda iti inaldaw a pagbiagda, maikkanda dagiti annakda iti disente a masakbayan babaen ti panangibaonda kadagitoy iti pagadalan ken mangragpat iti arapaapda iti masakbayan.

No ar-arigen, maysa laeng a band aid ti 4Ps a temporario a pangep-ep iti saem ti sugat, ngem iti di mabayag, agsublinto manen ti sanaang no di pay ket nakarkaronton ngem iti damo a pannakaukrit ti sugat.#