EDITORIAL: Adaywanyo dagiti fixers

Adaywanyo dagiti fixers, saankayo a mamati kadakuada ta mangloklokoda laeng, imballaag ti Professional Regulations Commission a nakabase iti Court of Appeals, Upper Session Road kalpasan a nasurok a sangaribu nga aplikante ti saan a nakaeksamen iti board examination para midwives a naangay idi Abril 29 ken 30 iti Baguio City.

Nasurok a sangaribu nga aplikante ti saan a nakapageksamen gapu ta awan ti naganda iti listaan dagiti examinees.

Kanaig daytoy, 21 a midwifery students ti nangipila iti kaso nga estafa maikontra iti Northcap Review Center gapu iti saan a pannakaproseso dagiti papelesda iti laksid a nagbayad dagitoy.

Karaman dagiti nagipila dagiti aplikante a saan a nakaeksamen iti napalabas a midwifery examination a pakairamanan dagiti sumagmamano nga  estudiante a taga-Candon City.

Kaaduan kadagitoy saan a nakapageksamen dagiti nagrebio iti Northcap Review Center a naggapu iti probinsia ti Ilocos Sur, Ilocos Norte, Pangasinan, Nueva Ecija, ken Mindanao.

Segun kadagiti biktima, maysa a babai a nangiyam-ammo iti bagina a Mrs. Munsayac ti maipagarup a nangkumbinsi kadakuada nga isun ti mangipagna iti aplikasionda nga ageksamen iti PRC.

Imbaga kano ti babai nga am-ammona ni OIC ti PRC Evangeline Vergara ket kinumbinsirna dagiti aplikante nga isu laengen ti  mangipagna kadagiti papelda ta malaksid a saandan a makipila pay, nadardaras ti pannakaproseso ti aplikasionda.

Nayat lattan dagiti aplikante uray mapapati a nanginngina iti P300 ngem iti examination fee nga intuding ti PRC ti siningir ni Munsayac agsipud ta saandan nga agrigat pay a makipila.

Ngem mapapati a saan nga impagna ni Munsayac dagiti aplikasion dagiti estudiante no di ket imbatina lattan iti naggiananna nga otel ket intaraynan dagiti nakolektana a kuarta.

Kinuna ti PRC nga agdagup iti 700 nga aplikante ti average a maproseso iti opisinada iti inaldaw. Ngem kinuna dagiti opisial ti PRC a kasapulan met laeng ti panagreport ti aplikante iti mismo nga  opisinada para iti validation ti papelna.

Masansan nga iyunay-unay ti PRC a saan a kasapulan ti fixer a mangipagna kadagiti papeles. Ngem no apay nga adda latta dagiti agpatulong iti fixers tapno mapadaras ti papelesda. Isu a no dadduma, adda met pakababalawan kadagiti aplikante no apay nga adda mapasamak a pannakaloko.

Agpaay koma a leksion ti napasamak iti Baguio City kadagiti agpaipagna iti papelesda iti PRC. Laglagipen nga awan ti maloko dagiti fixers no awan ti paloko nga aplikante. (JMA)