EDITORIAL: Addanto latta dagiti’Nalaad a Turista’

Maysa a damag ti nakaawis iti imatangtayo itay nabiit. Mainaig daytoy iti pannakaideportar ti agkabsat nga Amerikana manipud iti pagilian a Cambodia. Ti basol dagiti dua? Naduktalan dagiti otoridad a nagrinnetrato dagiti dua a turista a lamolamo iti uneg ti Angkor temple iti Cambodia.

Kas pannusa dagiti agkabsat gapu iti panaglabusda iti maibilang a sagrado a lugar, naikkanda iti suspended a sentensia nga innem a bulan a pannakabalud ken saanda a mapalubosan nga umadak manen iti Cambodia iti las-ud ti uppat a tawen. Napagmultada pay iti $250.

Daytoy ti maikadua a gundaway nga adda nasukalan dagiti otoridad ti Cambodia a turista nga agparetrato a lamolamo iti uneg ti templo.

Sakbayna, nasukalan met dagiti tallo a turista a French a nagparetrato a lamolamo iti uneg ti maysa a templo.

Ngem sakbay daytoy, nagbalin a viral iti social media ti ladawan dagiti babbai iti Asia a naretrato a lamolamo iti uneg ti templo ti Cambodia a nanggubuay iti nakaro a panagpungtot dagiti opisial ken nakagapu iti naing-inget a panagsiputda tapno malapdan dagitoy a mapasamak.

Maipalagip met kadakami ti panagtignay idi dagiti agtuturay iti Vigan a mangiparit iti panagpaala iti retrato a nakabikini iti las-ud ti core zone ti Heritage Village a pakasarakan kadagiti duog a balay a bato a naipatakder pay idi tiempo iti Kastila.

Dayawenmi dagiti agtuturay iti daytoy a panagtignayda agsipud ta nalapdan dagiti turista ken dagiti negosio a mangaramat iti Heritage Village a backdrop tapno maipromot dagiti produktoda babaen ti retrato dagiti babbai a mangiduyduyayat iti bagida.

Ibilang dagiti Cambodian ti Angkor Archaeological Park, nakalista a UNESCO World Heritage Site, a sagrado a lugar agsipud ta masarakan ditoy ti binangon ni King Suryavarman a Buddhist temple complex, ti kadakkelan a religious monument iti sangalubongan, a nagbalin metten a nakaidulinanna ken dagiti simmarsaruno nga agtuturay iti imperio.

Kas kadagiti taga-Cambodia, ibilangmi met ti Heritage Village a maysa a maraem a lugar a kasapulan ngarud a respetaren dagiti turista ket gesdanda koma ti bagida a mangabuso iti kinadaeg ken kinaisalsalumina daytoy a lugar a saan ketdi a pangidur-as iti bukodda nga interes babaen iti retrato dagiti babbai a dandani awanen ti abbong ti bagida.
Ta saan a malibak nga addanto latta dagiti ‘nalaad a turista’ nga agaramid kadagiti maikaniwas uray pagaammoda a pakamulitan ti kinasagrado wenno kinadaeg ti lugar a pagpasiaranda.

Aglalo itan ta napili ti Vigan a maysa kadagiti New7Wonders Cities of the World, agbalin koma ngarud dagiti agtuturaytayo a bihilante tapno saan a madadael ti kinaisalsalumina ken kinadaeg ti lugartayo a Vigan ken tapno agtultuloy ti pannakapreserba ken pannakakonserbarna iti sanguanan ti panaglupos ti sangalubongan iti panangarakupna iti moderno a panagbiag.#