EDITORIAL : Addanto latta panawen a makamatannaka ti linteg

Naiyalisen ni dati a Presidente Gloria Macapagal Arroyo manipud iti St. Luke’s Hospital iti Veterans Memorial Medical Center. Nupay makuna a nataktak ti pannakaiyalisna, awan ti dakes a napasamak. No adda man madi a pinataud ti nataktak a pannakaiyalisna manipud iti dati nga ospital a naggiananna agingga iti naituding a paggiananna bayat ti pannakadengngeg ti kaso a naisaklang maikontra kenkuana, isu ti panagpipingki dagiti balikas dagiti mangisakit kenkuana ken dagiti agtuturay iti Aquino administration. Kapaliiwan nga ad-adda la ket ngarud a narubroban ti saan a nasayaat a relasion iti nagbaetan ti kampo ni Arroyo ken iti kampo ni Pres. Aquino.

Maibilang nga iti umuna a dua a rikos, no boksing koma, nakapuntos manen ti gobierno iti pannakaikabil ti dati a presidente iti VMMC, iti babaen ti hospital arrest. Sakbay daytoy, nagballigi ti Department of Justice a nanglapped iti ipapanaw koma da Arroyo ken ti asawana a ni Miguel Arroyo iti pagilian nupay addan sumakayanda nga eroplano ken iti baet nga adda imparuar ti Korte Suprema a temporary restraining order iti pannakaipakat ti watch list order. Uray iti baet ti panagriri dagiti pannakangiwat ti dati a presidente, saan a nagkir-in ti DoJ iti pagtaktakderanna, ket awan ti nabalinan ti grupo da Arroyo no di ti panangisublida ken ni Cong. Gloria Arroyo iti St. Luke’s Medical Center.

Simmaruno ti pannakaiyetnag ti arrest warrant iti dati a presidente mainaig iti kasona nga electoral sabotage gapu iti mapapati a naisayangkat a panagsuitik iti eleksion idi 2007. Maysa a non bailable offense ti electoral sabotage ket no makonbiktar ni Cong. Arroyo, posible a tungpal biag ti sentensiana.

Kas nakuna ni Budget Secretary Florencio “Butch” Abad, uray ita ta nakabaluden ni Cong. Arroyo, saan nga agrelaks ti agministrasion Aquino, adu pay ti masapul nga aramidenda agingga iti adda maipaulog a pannusa ken mapaneknekan a nakabasol ni Cong. Arroyo kadagiti naisaklang kenkuana a kaso.

Kasapulan nga agsagana ti pamilia Arroyo nga agsarapa kadagiti maisaklang pay a kaso maikontra iti dati a presidente ken ti pamiliana kas iti fertilizer scam, North Railway deal, ZTE broadband deal, ken dadduma pay.

Pammaneknek nga iti daytoy a lubong, no adda naaramidmo a panaglabsing iti linteg, addanto panawen a makamatannaka ti gamat ti linteg, uray sadino ti paglemmengam, ken uray kasano a panangpadasmo a mangkalub kadagiti madi nga aramidmo.

Leksion daytoy a saan laeng a ni dati a Presidente Arroyo ti pakaituronganna no di pay dagiti agtuturay nga agabuso iti takemda bayat iti kaaddada iti koridor ti gobierno.#