Footer

EDITORIAL: Adu dagiti paltog iti ikut dagiti di responsible a tattao

Itay lawasna, nadayyeg ti probinsia gapu iti pammaltog sadiay Barangay Balaleng Laudenia, Bantay, Ilocos Sur. Iti daytoy nga insidente, tallo a biag ti nagudas. Ita, nakamassayag dagitoy idinto nga agladladingit dagiti pamiliada.

Mapapati a nagramut ti pammaltog gapu iti riri iti dado. Ngem no amirisen, saan koma nga umdas daytoy a mangiduron iti maysa a de-pamilia a manggudas kadagiti kalugaranna a maysa pay met kadakuada ti kumpadrena. Ken nangruna, saan koma a napasamak daytoy no awan ti ikut daytoy a paltog a nangsairo iti nakullaapan a panunotna tapno manggudas iti biag.

Nagudas met ti pimmaltog kadagiti agkabsat babaen ti maysa a polis a kalugaranda met laeng.  Segun iti inbestigasion, idi nakangeg ti polis kadagiti kanalbuong, rimmuar iti balayna tapno agusisa. Nakitana dagiti dua a tao a napasag ken ti suspek a nakaiggem pay laeng iti paltogna.

Nagpabigbig ti polis idinto nga imbilinna ti panangisuko ti suspek iti paltogna. Ngem mapapati nga impaturong ti suspek ti paltogna iti polis ket napilitan ti naud-udi a nangpaltog iti suspek a puon ti nakatayan daytoy.

Nakas-ang nga annugoten ngem napaneknekan manen ti pagsasao a no ania ti inmulam, isu ti apitem. Kimmettel ti suspek iti biag babaen iti paltog ket nakettel ti biagna babaen met laeng iti paltog.

Ngem ditoy pagilian, maysa a kinapudno ti panagraira dagiti paltog iti ikut dagiti saan a responsible a tattao. Paneknekan dayta dagiti naruay a pammapatay nga insayangkat dagiti riding in tandem, dagiti panagsaneb, panaghold-ap, dagiti krimen a nakausaran dagiti paltog.

Kunaentayo a saan met a nagbaybay-a dagiti pannakabagi ti linteg iti pagrebbenganda. Masansan a mairakurak iti radio, iti telebision ken mabasa kadagiti warnakan dagiti panagsukisok nga insayangkatda kadagiti pagtaengan dagiti masuspetsa nga adda iduldulinda a paltog ngem kaadduanna met a dagiti makumpiskada ket dagiti aglatlatin a paltik wenno kadaanan a kalibre. Ngem saan a malibak nga adu dagiti aglemlemmeng a nangato ti kalibreda a paltog a masansan a maaramat kadagiti krimen wenno dakes wenno illegal nga aramid.

Maigunamgunam ngarud ti naing-inget a proseso iti panagtagikua kadagiti paltog. Masapul a naes-estrikto ti panangimbestiga iti kinatao dagiti agaplikar iti lisensia nga agikut iti paltog. Nakaam-amak a palubosan  ti maysa a tao nga agikut iti armas idinto a nagatel ti ramayna a kumalbit iti gatilio.#