Footer

EDITORIAL: Adu ti maidiaya a putahe ngem isu met la isu ti ramanda

Nagadu nga anggulo ken ang gulo a nasurat maipapan iti umadanin a SONA ni Presidente Benigno Simeon Aquino III, kas iti nagduduma a naidiaya nga agkakaimas a putahe. Ramanan ida. Isuda amin. Ngem kaadduanna ti sigud  wenno gagangay a raman. Saan a nagbaliw a raman. ‘Su met la nga isu, no saan nga agdillaw, mangidayaw. Essemanmi nga inkam koma agkilabban iti nagkaysa-naidumduma, naisupadi a raman, ‘tay koma inkam agtig-ab iti kumarabukob.

‘Tay tig-ab nga agturong iti nalinteg a panagbalbaliw ken mangipaay iti paratignay nga agturong para iti sangsangkamaysa nga umili. ‘Tay koma mangited iti panagkikinnayammet a di ket mangipaay iti agsasamusam a babalaw, a no dadduma isu ti taudan ti pannakaulaw. ‘Tay koma mangawid nga agturong iti panagkaykaysa ken panagkikibin a mangbuya iti isisingising ti init iti baro nga agsapa. Ta saan kadi a daytoy ti kangrunaan nga esseman ti kaaduan? Ti essem a tartarigagayan para iti masakbayan dagiti sumarsaruno a kaputotan? Ti essem a panagbalbaliw.

Ngem umel ti tektek ti saltek ti panagbalbaliw no addanto pay la makita a panagsisina iti pagturongan a direksion. A maysanmaysa agturong iti bukod a gagem; panangiduron ti essem ti irarangpaya ti bukod a panggep ken ambision-politikal nga isu ti mangkutkot iti dakkel a giwang iti nagbabaetan. Agindurog ti partisanship a managimbubukod ket mangibunga iti saan a naannayas a panagbiag.

Panawenen nga idisso ti nakaisigudan a gerra-politikal. Idisso koman dagiti saan a maikanatad a sobra a bagahe iti panagturong iti irarang-ay. Kasapulan unay ti panagbuggo – ti panangbalbaliw iti panangiturong iti gimong.

Panagkunami, saan a maikanatad nga irukbos ti aramid – ni oposision inna padagsenan ti baklay ni nakatugaw tapno agserbi a babantot ket maitikleb. Ni nakatugaw inna met isaruag ti iket a mangkalap ti asinoman a lapped iti tignay wenno kas iti napaliiw kadagiti naglabas, agallangogang ti kari a no agkayab ti puyupoy, itayab ti kali. Pagangayanna, ti isyo a maparnuay ket agtultuloy nga irarangpaya ti dangadang nga awan mamaayna.

Adayo pay nga agsipasip ti baro nga agsapa no saan nga idian ti panagpinniltak iti rupa. Uray no adu dagiti maidaya a putahe, saanto a pulos agtik-ab ti mangilabban.

Saan a maikanatad ti innarrabas no gamgamen ti nakananama a panagdur-as. (JMA, Jr.)