Footer

EDITORIAL: Adu unayen naputar a linteg

Saan unay a naipublikar kadagiti aginaldaw a pagiwarnak daytoy a napasamak iti Senado a maibilang a maysa a biddut a di ninamnama a maaramid ti maysa a nalaing ken beterano a mammanday-linteg.

Ti impila ni Senador Edgardo Angara a maysa a gakat a mangpugipog iti korapsion kadagiti pangopisinaan babaen ti pannakapukaw iti red tape iti burokrasia iti pagilian ti dakdakamatenmi ditoy.

Iti umuna a panagkita ket makuna nga ingget sayaat daytoy a gakat agsipud ta maikkan iti naing-inget a pannakarisut ti nabuntog a pannagna dagiti kasapulan a papeles wenno dokumento, wenno transaksion kadagiti opisina iti gobierno a kasapulan pay ti maikurimed a papetpet wenno pangpagalis tapno magna wenno agkuti dagitoy.

Ngem anian ta adda gayamen kapadpadna a gakat ken naipasa payen a linteg idi kanikatlo a tawen. Gakat daytoy ni Sen. Panfilo Lacson a pinirmaan ni Presidente (idi) Gloria Macapagal-Arroyo a linteg, ti RA 9485 wenno ti Anti-Red Tape Act of 2007.

Inrugi payen ti gobierno nga inyimplementar daytoy a linteg idi napan a tawen.

Idi impila ni Angara ti gakatna, posible a dina malagipen wenno awan ti pannakaammona nga adda kapadpadna a gakat a nagbalin payen a linteg.

Ania ti kayat a sawen daytoy a biddut?

Umuna, adu unayen dagiti linteg ditoy pagilian a kalpasan ti pannakapirmada a linteg, saan met a nayim-implementar no di ket agbubuotda iti nakaipaknianda.

Pagarigan daytoy Anti-Red Tape Act of 2007.

Kuna ti RA 9485, lima laeng nga aldaw ti deadline para iti pannakalpas ti simple a transaksion ken 10 nga aldaw kadagiti narikrikut a transaksion ket madusa dagiti pangulo dagiti departamento wenno opisina a mangipalubos iti nabuntog a pannakalpas dagitoy a transaksion.

Kuna pay ti linteg a lima laeng ti bilang dagiti agpirma kadagiti dokumento, saan a kas iti napalabas a nasurok a 20 ti agpirma.

No agpayso a nayimplementar ti RA 9485, apay nga agtultuloy met latta ti nabuntog a pannagna dagiti dokumento ken papeles; kasta met dagiti transaksion kadagiti nadumaduma nga opisina ti gobierno. Pammaliiwmi ket kimmaro pay ketdi ta kaadduanna a saan a magna dagitoy no awan ti maikurimed a papetpet wenno pagpagalis iti dakulap ti maysa nga empleado wenno nangato nga opisial.

Adu nga agpayson dagiti napanday a linteg iti pagilian. Ti biddut ni Angara ti mangpaneknek nga adu dagiti linteg a makaited koma iti pagimbagan wenno pakaidur-asan ti panagbiag ken tumulong iti pannakapugipog dagiti maikurkurimed nga aramid a mangpabuntog iti pannakaited dagiti serbisio a rumbeng a maipaay kadagiti agkasapulan nga umili.

Ngem anian ta dida mayim-implementar ken agbubuotda la iti nakaipaknianda.#

, ,