EDITORIAL: Agbalbaliwkan, Kakang!

Kakang, ipasagepsepmo dita panunotmo a saanen a maysa nga ordinario laeng a siudad ti Vigan. No managpaliiwka, makitam a nagbalinen ti siudadtayo a maysa kadagiti kangrunaan a destinasion dagiti turista nga agpasiar iti pagiliantayo.

 

Isu a rumbeng metten nga iwalinmo dagiti saan a maiparbeng nga aramidmo iti kallabes, Kakang.

 

Mangibinsaak iti sumagmamano.

 

Mamin-anon a makitkitaka a mangipitik iti sigariliom iti uray sadino la ditan a lugar uray no adda ordinansa a mangiparit? Wenno ti panangilimedmo a mangibelleng iti wrapper, wenno nagbungonan iti candy wenno mineriemdam iti uray ania ditan a lugar? Sabali pay ti pananglasatmo lattan iti berde a karuotan iti sanguanan ti Vigan City Convention Center uray adda nakapaskil a maiparit a pagnaan. Sabali laeng ti ibaballasiwmo lattan iti kalsada uray awan pay ti go signal ti traffic enforcer.

 

Iti met panagpasadam, kasapulanen nga agbalinka a managdayaw, nangruna kadagiti turista a pasaherom. Saan a maiparbeng, kas agindeg iti Vigan City a singirem ti pasaherom iti nanginngina ngem iti intuding ti ordinansa a plete. Saan amin nga umay ditoy Vigan  ket milionario ken aglaplapusanan. Adu kadakuada dagiti kailiantayo a nagsalimetmet ken nagurnong tapno makitada laeng ti siudadtayo ken duktalenda no apay a napili a maysa kadagiti pito a pagsiddaawan a siudad iti lubong.

 

Isu a panawenen nga agbalbaliwka, Kakang! Ipalladawmon dagiti dakes ken di umisu nga aramidmo iti kallabes. Makitinnulongka ketdi a mangpasayaat ken mangpatalinaed iti napintas nga imahe ti siudadtayo tapno nakalallagip ti padas dagiti umay agpasiar ditoy ket agsublidanto manen iti masakbayan ken ibandoda iti kinapintas ti Vigan City ken ti kinamanagsangaili dagiti agindeg.

 

Manamnama kadi ti suportam, Kakang?