EDITORIAL: Agkutikutin dagiti politiko

Iti daytoy a kasapa, madlawen ti panagparasapas dagiti politiko, nangruna dagiti adda panggepda nga agkandidato iti nangatngato a posision. Yan ti rigatna, magnan ti kinnaradap, panagbibinnato iti pitak ken panagdidinnadael iti dayaw ken nagan, ken panangiparuar kadagiti bulok ken agal-alingasaw a bangsit a kalkaluban dagitoy a politiko.

Dakkel a biddut ni Vice President Jejomar Binay ti panangideklarana a tumaray a para presidente. Kampante siguro ni Binay ta iti resulta dagiti surbey, ti naganna ti kangatuan iti rating kadagiti botante. Ania ti napasamak? Limtuad dagiti nadumaduma a mapapati nga anomalia a nakaisangkotanna, dagiti proyekto a mapapati a naggakupanna iti minilion para iti bukodna a pagimbagan. Gapu kadagitoy a manangimameg a damag, bimmaba ti popularidad ni Binay. Iti biang dagiti political analyst, maysa a biddut ti nasapa unay a panangipakaammona ti interesna nga agkandidato iti kangatuan a puesto iti gobierno.

Idi eleksion ti senador idi 2013, saan unay a naikkan iti importansia ti maysa a Grace Poe. Kadagiti surbey sakbay iti eleksion, awan ti naganna iti umuna a lima dagiti manamnama a kangatuan ti mabutos. Ania ngarud ta agdadamo, saan unay nga am-ammo dagiti tattao malaksid nga isu ti anak da Fernando Poe, Jr. ken ni Susan Roces.

Idi madagumpon dagiti butos, naklaat laengen ti publiko ta isu metten ti kangatuan iti butos, inatiwna pay da Alan Peter Cayetano, Chiz Escudero ken Loren Legarda.

Ita, nabanglo ti naganna para presidente. Iti kaudian a surbey, inatiwna payen ni Binay iti rating.

Gapu itoy, rugrugianen dagiti saan a mamati kenkuana a dadaelen ti naganna. Maysa a politiko ti nagkuna a no ar-arigen agassinuso pay laeng ni Poe, adu pay ti rumbeng a sursuruenna sakbay a panggepenna ti agpresidente.

Maysa met a naabak a kandidato ti nagipila iti petision a madiskualipika ni Poe gapu ta saan a natural-born citizen iti pagilian ken agkurang iti residensiana idi nagtaray a para senador.

Kinuna ni Poe a nabang-aran iti daytoy kaudian a tignay a mangterred iti interesna nga agkandidato no bilang makaikeddeng a dayta ti aramidenna, agsipud ta maikkanen iti gundaway a mangsungbat kadagiti saan a husto nga ibambansagda maikontra kenkuana.

Ni DILG Secretary Mar Roxas, saan met a nailasa kadagiti pammadpadakes. Adda dagiti kritiko a mangibagbagaq a saan nga iduron nga agpangato ti panangiyendorso kenkuana ni Presidente Benigno Aquino agsipud ta nakapsut a kandidato. Adda pay dagiti grupo a mangibagbaga a saan a maiyannatup nga agbalin a presidente agsipud ta nalaka a managpudpudot. Sabali laeng ti mangibagbaga a dakkel a mangsippadong iti tarigagay ti asawana, ni Corina Sanchez.

No malagipyo, dakkel a nakalamawan idi ni Corina Sanchez ti damag a madi a panangtratarna iti maysa a katulongna iti balayna.#