EDITORIAL: Agpanaw latta dagiti propesional

Agtultuloy latta ti panagpanaw dagiti propesional iti baet ti panangipaspasindayag ti agdama a gobierno nga adu ti dimmur-asan ti ekonomia ken umad-adu dagiti dadakkel a negosio nga agibaut iti puonanda ditoy.

Maysa nga ehemplo ni Lilibeth a nakaiskediul a mapan iti Canada inton umay a bulan. Nupay nailanad iti pasaportena a sumrek a kas turista, adda clause ditoy a mabalinna ti umawat iti trabaho bayat ti panagindegna iti daytoy a pagilian. Nupay ibagbaga ni Lilibeth nga agsublinto iti pagilian agsipud ta nangato ti puestona iti pagadalan kas maysa a dean, nubenta y nuebe porsiento a saanen aglalo no makabirok iti trabaho a mangitanggaya iti dakkel a sueldo kas maiyannatup iti kurso ken kabaelanna.

Saanen a nasken a saludsoden no apay a mapanunot pay laeng dagiti propesional ditoy pagilian kas ken ni Lilibeth ti pumanaw tapno bumirokda iti “naberberde a pagaraban” iti sabali a pagilian. Kasla nalittikan a plaka nga agsublisubli dagiti rason, ngem ingget pait nga apro a saan a kabaelan ti gobierno nga alimonen.

Umuna, nababa ti sueldo dagitoy a propesional, iti man pribado wenno publiko a sektor. Irasrason dagiti dadakkel a negosio a no itedda iti sueldo a maiyannatup iti kabaelan ken inadal dagitoy a propesional, kapilitan nga agikkatda kadagiti empleadoda. Mabalin a pudno, mabalin met a saan. Ngem iti daytoy a situasion, kapilitan nga irutan dagiti mangmangged ti sinturonda.

Maikadua, nakisang dagiti benepisio a maipaay kadagiti mangmangged iti pagilian, nangruna dagiti propesional. Ditoy pagilian, agarup iyarado ti propesional ti bagina tapno makategged iti umdas para iti pamiliana idinto nga iti sabali a pagilian, makapakatay dagiti benepisio a sagsagrapen dagiti mangmangged, kas iti ab-ababa nga oras ti panagtrabaho, overtime pay, benepisio iti salun-at ken dadduma pay.

Maikatlo, nabattaway ti promosion. Ditoy pagilian, annugoten man dagiti agtuturay wenno saan, kaadduanna a magmagna pay laeng ti padrino system. No napigsa ti kapetmo iti ngato, ingget daras ti promosionmo. Ngem no awan ti mangikugtar kenka nga agpangato, amusayem laengen ti subsobmo, agsipudd ta arigmo naipigket iti agdama a puestom.

Sumagmamano laeng dagitoy nga ibinsami. No ilanadmi amin ditoy, saan a malaon daytoy a panid.

Agpayso, mabalin a simmayaat ti ekonomia iti babaen ti administrasion ni Presidente Benigno Aquino III ngem iti biangmi, saan a marikna wenno dumanon kadagiti umili dagiti benepisio nga itden ti dumurdur-as nga ekonomia. Iti imatang ketdi dagiti umili, dagiti babaknang ti ad-adda a bumaknang idinto a kumarkaro ti kinapanglaw iti sidong dagiti babassitan.

Iti let-ang ti kinapanglaw, kasano a malapdan ti gobierno ti panagpanaw dagiti umili, nangruna dagiti propesional?#