EDITORIAL: Agpinsantayo a mangibutos iti Vigan iti New7Wonders Cities of the World

Kasapulan ita ti Vigan City ti suportatayo, Ilokano ka man, Ibanag, Igorot, Panggalatok, Tagalog, Bisayana wenno taga-Mindanao iti kampania a mairaman a maysa kadagiti kabarbaro a pito a pagsidsiddaawan a siudad iti sangalubongan.

Addan ti kumpetision iti maudi a dua a rikos ket kasapulan ti Vigan City ti napigpigsa pay a suporta tapno makalusot iti daytoy ingget risiris a kampaniana tapno mairaman a New7Wonders Cities of the World.

Inton Oktubre 7 daytoy a tawen, maiwaragawagton dagiti 14 finalists a siudad ken inton Disiembre 7, maammuantayonto metten dagiti pito a siudad a maikur-it a New7Wonders Cities of the World.

Idi Hulio 7, limsot ti Heritage City of Vigan a maysa kadagiti 21 a finalists iti nasao a kumpetision. Manipud iti uppat nga entries ti pagiliantayo, ti laengen Vigan City ti nabatbati a mangibagi iti pagiliantayo a Pilipinas iti daytoy a kumpetision a kabalubalna dagiti nabileg, naprogreso ken dadakkel a pagilian iti sangalubongan.

Saantayon nga uliten ditoy ti dakkel a pakaidayawan ti pagilian no mairaman ti Vigan City kas maysa kadagiti pito a baro a pagsidsiddaawan a siudad iti sangalubongan. Nakitatayo ti dakkel a nagluposan ti Palawan idi nairaman ti Puerto Princesa Underground River a maysa iti New7Wonders of Nature idi 2011.

Kinapudnona, rumbeng laeng a maited daytoy a pammadayaw iti Vigan City gapu iti kinaisalsaluminana a siudad a saan a makita kadagiti kasalipna iti pammadayaw. Namirit iti pakasaritaan, ti Vigan City ti maikatlo a kaduogan nga Spanish settlement iti pagilian, umuna ti Cebu ken ti Manila. Mabirbirngasan iti Intramuros iti Amianan nakatakder pay agingga iti agdama dagiti duog a pagtaengan a nasalimetmetan ken napreserba iti baet dagiti naglabas a nasurok uppat a siglo.

Manipud idi inlista ti Unesco ti Vigan a maysa kadagiti Heritage Cities iti Sangalubongan, nagukkonen kadagiti nadumaduma a pammadayaw babaen ti matalek a panangimaton dagiti agtuturay iti siudad ken pannakikammayet dagiti umili ken nadumaduma a sektor. Dakamatentayo ditoy ti prestisioso a pammadayaw a nagun-odna idi 2012, kas Best Practices in World Heritage Site Management a nangibalatanna kadagiti 28 a siudad iti 23 a pagilian iti lubong.

Kas kuna ni Mayor Eva Marie S. Medina, maysa laeng a puling ti Vigan City no maidilig kadagiti moderno ken dadakkel a siudad a kasalipna iti New7Wonders Cities of the World. Wen pudno dayta, ngem kas iti Biblia nga adda David a nangiluges iti maysa a higante a Goliath, ipakitatayo nga uray kasla puling ti Siudad ti Vigan gapu iti kinabassitna, babaen ti agresibo a panagtitipkeltayo, panagtitinnulongtayo, panagmaymaysatayo, maibayogtayo ti Vigan City a maysa kadagiti pito a baro a pagsidsiddaawan a siudad iti sangalubongan agsipud ta ti dayaw a magun-odna no mairaman iti New7Wonders Cities of the World ket dayawtayo amin a sangkapagilian, dayawtayo amin a Pilipino, dayawtayo amin a mangipatpateg iti kultura, kaugalian, pakasaritaan, ken kaipapanan ti pulitayo nga ibagian ti Siudad ti Vigan.

Kakailian, agpinsatayo ngarud a mangsuporta iti Vigan iti daytoy a kampaniana ket aglaplapusanan nga ibutostayo iti New7Wonders Cities of the World. (SAE)

(Adda tuloyna)