EDITORIAL: Agtarakitik kadin ti grasia kadagiti napanglaw nga umili?

Kuna ti gobierno nga iti isasayaat ti ekonomia ti pagilian, mangrugin a sumayaat ti panagbiag dagiti umili.

Ngem kasungani ti imbatad dagiti ekonomista bayat ti maysa a forum a naangay iti Ateneo de Manila University: saan pay nga agtarakitik kadagiti marigrigat dagiti benepisio ti sumaysayaat nga ekonomia kas ibanbando ti gobierno.

Segun kadagiti economic managers ti gobierno, simmuyop ti gross domestic product iti pagilian iti 7.3 porsiento idi 2007, kapintasan a performance ti pagilian iti 31 a tawen.

Iti met report manipud iti National Statistics Office, bimmassit ti bilang dagiti awanan panggedan iti 6.3 porsiento idi Oktubre 2007 manipud iti 7.3 porsiente iti dayta met la a bulan iti napalabas a tawen.

Maibasar iti report ti National Statistics Office, bimmassit ti unemployment rate iti 2.2 million.

Ngem kinuna dagiti ekonomista a saan a pammaneknek iti  nadurdur-as nga ekonomia kas ibanbando ti agdama nga administrasion ti bimmaba nga unemployment rate iti pagilian.

Ibilang dagiti ekonomista nga artipisial laeng ti panagpababa ti bilang dagiti awanan panggedan agsipud ta nainpluensiaan iti panagpanaw ti labor force iti pagilian tapno manggedda iti ballasiw-taaw, ti yaadu ti bilang dagiti umili a saan nga interesado nga agtrabaho gapu iti kinakisang ti nangato ti kalidadda a pagtrabahuan wenno gapu iti panagdependeda kadagiti ipawpaw-it dagiti kameng ti pamiliada nga agtrabtrabaho iti sabali a pagilian.

Gapu ta saan a nairaman dagitoy nga umili iti labor force ti pagilian bayat ti pannakaisayangkat ti nasao a surbey, ad-adda a nakapappapati nga adda 3.5 million nga umili nga awanan panggedan idi Oktubre, kuna dagiti ekonomista.

Nadakamatda pay a dagitoy a tattao ket saanda nga agtrabtrabaho agsipud ta nababa ti kalidad dagiti trabaho a pakasumrekanda idinto nga ur-urayen dagiti sabsabali ti gundawayda nga agtrabaho iti ballasiw-taaw.

Iti sabali a pannao, agsipud ta bimmassit ti partisipasion ti labor force, nagtungpal a basbassit dagiti awanan panggedan ngem saanna a kayat a sawen a gapuen daytoy iti simmalun-at nga ekonomia.

Imbistrad dagiti ekonomista a nupay adda napaadda a 500,000 a kabarbaro a trabaho iti industria ken serbisio idi Oktubre idi napan a tawen, napukawan ti agrikultura iti 25,000 a trabaho.

Inyunay-unay dagitoy nga ekonomista nga iti koma agrikultura ti pangipaayan ti gobierno iti kangrunaan nga atensionna, iti panangpaaddana iti pagtrabahuan iti daytoy a sektor agsipud ta ditoy ti paggapuan iti kaaduan kadagiti nakurapay nga umili.

Santo la makuna nga agtarakitik dagiti benepisio ti nabaludbod nga ekonomia kadagiti nakurapay nga umili, no makaparnuay ti gobierno kadagiti panggedan a maisentro iti sektor ti agrikultura, kuna dagiti ekonomista.#