Footer

EDITORIAL: Agtawenen iti 14 ti TNM!

Ne, nagdarasen ti panagtulid ti panawen! Nagteng gayamen ti Tawid News Magasin ti Maika-14 a tawenna. Saan a nakapappapati, ngem isu ti pudno! Linawas a rimmuar, saan a nagliway. Nupay maibilang a di naaratan a desdes ti nagnaanna, himmigante a bantay ti inulina ngem saan a nalpay wenno simmuko kadagiti pannubok.

Nasam-it ti balligi a minuli iti pannubok. Balitokto pay ket nasken a maluto iti apuy tapno maisina dagiti rinetna ket agbalin a natarnaw, rumimatrimat kadagiti mata. Kasta ti kaiyarigan ti TNM.

Nangrugi a kas maysa a  magasin. Naisapsapit iti Saringit Chronicle. Kasla suplemento.  Nupay nanumo, nababagas dagiti linaonna. Ngem agsipud ta narigat makaala iti advertisement ti maysa a magasin, uray no aglinawas a rummuar, isu a napagbalin a Tawid News Magasin, iti format a broadsheet. Napipia ti maysa a pagiwarnak ta no addan iti makatawenna a continuous a rummuar, makaalan iti judicial notices ken dadduma pay a legal proceedings.

Dagiti laonen ti magasin ti maysa a parikut idi. Isu a sinuratanmi dagiti pada a mannurat a mangtarabay iti inna isasantak, uray dagiti editor dagiti babasaen iti Region I, Cordillera ken Cagayan Valley. Adu dagiti nangipatulod iti artikuloda, sarita ken dandaniw.

Immuna a sinagaba dagiti mangimatmaton a pannubok ti pammabalaw manipud iti maysa a foundation gapu iti pannakaaramat iti balikas a Tawid. Kayatmi nga ipalawag a saan a dakami iti nagtaudan dayta a balikas wenno nagan no di ket isu ti pinili a mismo ti DTI manipud iti tallo a nagan a pagpilian. Ti singasingda a nagan ket sinurotmi laeng,. Ken maysa, ti nagan ti foundation ken ti maysa a babasaen ket agduma iti statusda.

Simmaruno ti panagriri dagiti dadduma pay a babasaen, a saan kano a mabalin a patarayen ti maymaysa a publisher ti dua a pagiwarnak iti maymaysa a probinsia ken mairaman kadagiti raffle kadagiti judicial notices, special  proceedings ken dadduma pay a legal advertisments. Napasamak ngarud ti reorganization. Naikabil iti editorial box nga agduma dagiti tattao a mangimaton ti Saringit Chronicle ken ti Tawid News Magasin.

Ti kadagsenan, simmabuag ti higante a dalluyon a nangduprak iti dati a natibker a singgalot dagiti mangimaton iti dua a pagiwarnak.    Naiserra ti Saringit Chronicle, ngem natibker latta ti takder ti TNM, umang-anges nupay nanglaylay ken naginana ti inana, nalasatna ti pannubok, nagtultuloy iti inna panangited iti impormasion ken literatura.

Maika-volume 14, ngem agtultuloy pay laeng ti inna panagbilang. Magtengna pay ti sabali a 14? Wen, maipanamnamami nga addanto latta ti Tawid News Magasin, agsipud iti kaaddayo – dagiti sponsors, advertisers ken patrons – a saan a maum-uma a timmarabay kadakami ken nangitag-ay iti pagiwarnaktayo iti agdama a pedestalna. (JMA, Jr./SAE)