EDITORIAL : Agwaliwali nga imahe

Iti mata dagiti ordinario a tattao, saan a natibker ti takder daytoy Korte Suprema nga idauluan ni Chief Justice Renato Corona.

Pagarigan ti desisionna iti kaso nga illegal a pannakaikkat dagiti 1,400 nga stewards nga impila ti  Flight Attendants’ and Stewards’ Association of the Philippines (FASAP) maikontra iti Philippine Airlines.

Kitaentayo dagiti naglasatan ti nasao a kaso.

Idi Hulio 22, 2008, pinaboran ti Korte Suprema ti FASAP ket indeklarana nga illegal ti retrenchment dagiti nadakamat nga empleado.

Nangipila ti PAL iti mosion para rekonsiderasion ngem idi Oktubre 2, 2009, pinaboran manen ti SC ti FASAP idinto a kinunana a pinalen ti desisionna.

Ngem iti baet a pinalen ti desision ti SC, nangipila latta ti PAL iti sabali pay a mosion para rekonsiderasion, nga inawat met ti Nangato a Pangukoman. No apay, isuda laeng ti makaammo.

Idi Septiembre 27, 2011, imbasura ti SC ti maikadua a motion for reconsideration ti PAL ket inkeddengna a pinal ti desisionna a pabor iti FASAP.

Ngem maysa a surat manipud iti abogado ti PAL, ni Estelito Mendoza, ti nangkuestion iti komposision ti dibision a nangipaulog iti desision.

Ket idi Oktubre 4, rinekol ti SC en banc ti pammilin ti second division idi Septiembre 7.

Narigat a patien a baliktaden ti Korte Suprema dagiti namitlon a desisionna a nangpabor iti FASAP agsipud ta illegal ti pannakaikkatda ket rebbengna a maited kadakuada dagiti sueldoda bayat ti panawen ti pannakaikkatda ken iti pannakaisublida iti puestoda babaen laeng ti maysa a surat ti legal counsel ti PAL.

Imbes a makaanges koman dagiti na-retrenched nga empleado ta agbanagen ti kaso, agsublida manen iti rugi ket agtuloy nga agsagabada manen iti naunday a panawen bayat ti panangirupakda iti kasoda a posible pay a pakaabakanda.

Akuen man wenno saan dagiti madaydayaw a justices, ad-adu la ketdi ti mangbababalaw iti institusion nga ibagianda agsipud ta saan a makapnek ti rason – aniaman dayta a rason – iti panangbaliktadna kadagiti desisionna gapu laeng iti maysa a surat ti abogado ti maysa a bangir a saan man laeng a naikkan ti sabali a partido iti gundaway nga agkomento wenno mangkontra iti nasao a surat.

Iti kallabes, ti SC ti maibilang  a maudi a kamang dagiti naabuso dagiti kalinteganda ngem iti daytoy agwaliwali nga imahena, mapukawna la ketdi ti naan-anay a panagtalek ken panagraem dagiti umili.#