EDITORIAL: Aldaw ti Kinamaingel

Ti makunami iti tinawen nga Araw ng Kagitingan ket saan a gagangay a selebrasion no di ket panangipasagepsep kadagiti agtutubo ken ub-ubbing ti kinapateg ti kinamaingel dagiti inna ken amma lalo idi panawen ti maikadua a gubat sangalubongan, a nangibukbokan dagiti bannuar iti saan a magatadan nga ayatda iti ingungoten a pagilian babaen ti panangsaluadda a sitatakder ti bandera ti pagilian. Panangipasagepsep ti kaipapanan itoy nga isu koma ti maibudak iti puso ken nakem ti siasinoman, lalo kadagiti agtutubo ken  ub-ubbing ta ti patriotismo ket panangipamatmat iti kinaasino, nga awan ti mapalubosan a mangidadanes iti nagan ken dayaw. Dayta ti kinapudno ken kaimudingan daytoy a tinawen a selebrasion.

No taldiapan ti pakasaritaan, awan ngatan ti makapatar iti kinaandur ken kinapinget dagiti bannuar a Pilipino ken Amerikano a nangdependar iti maudi a sarikedked, ti Bataan ken Corregidor.

Ti impakita dagiti maingel a bannuar ket ehemplo ti nasin-aw a patriotismo a rumbeng la unay a taginayonen ken ipateg dagiti agtutubo ken ub-ubbing. Ti patriotismo ket saan laeng nga iti panawen ti gubat a pangipakitaan a sitatakder ti bandera no di ket iti amin a kanito, iti aniaman a panawen.

Ti pagilian iti agdama ket sisasango iti nagdadagsen a krisis ken pannakalukot (crunch), no intay inaganan dagiti sumagmamano: saan a panagkikinnaawatan dagiti lider, ti insurhensia, ti krisis sadiay Mindanao, ti soberenia iti Sabah ken dagiti isla iti Spratly, ti dumakdakkel a bilang ti populasion, ti kinakurang panggedan, ti kinakurapay, ti panaglabsing iti kalintegan ti tao; iti pakabuklan ti amin, umas-asug ti pagilian iti panangipakita iti kinamaingel iti pannangidangadang kadagitoy a parparikut, kinamaingel a kas iti impakita dagiti bannuar idi Maikadua a Gubat Sangalubongan babaen ti panangipaay a kanayon a sitatakder ti bandera iti panawen ti gubat, krisis ken pannakalukot.

Ti pudno a kaipapanan ti selebrasion ti Araw ng Kagitingan ket addan kadagiti dakulap iti asinoman, ta inyawaten dayta dagiti naindaklan a bannuar. Intay ngarud palugodan a sitatakder ken agwagayway nga agnanayon; saan a palubosan a maidagem iti agsasamusam a krisis ken pannakalukot a sangsanguenna iti agdama. (JMAJr.)