: EDITORIAL: Ama, pakawanem ida ta dida ammo ti ar-aramidenda | Tawid News Magazine - Weekly Ilocos News 📰

EDITORIAL: Ama, pakawanem ida ta dida ammo ti ar-aramidenda

Nagpadispensar ti padi a nangbassawang iti maysa a 17-ti-tawenna a babai bayat ti pannakabuniag ti anakna iti Sacred Heart Chapel iti Barangay Jagobiao, Mandaue City itay nabiit.

Iti surat ni Fr. Romeo Obach iti babai, kinunana a nadangkok ken saan a maiparbeng iti maysa a padi ti inaramidna.

“Publiko a dumawatak iti naimpusuan a padispensar iti ina ti ubing ken kadagiti asideg a pamiliana. Dagiti imbalikasko ken ti nagubsang nga impakitak sakbay a namuniagak idi Domingo… ket agpayso a saan a maiparbeng,” kuna ti maysa a paset ti surat.

Ita, indawat ti single mother a sardenganen ti publiko a kritikaren ni Fr. Obach agsipud ta pinakawannan daytoy.

Segun ti ina, mismo a napan ni Obach iti balayda idi sardam ti Hulio 9, ket idi linuktanna ti ridaw, makasangsangit ti padi a nangarakup kenkuana ken dimmawat iti pammakawan.

Kinuna ti babai a nariknana ti kinasinseridad ni Obach ket pinakawannan ti padi. Nataltalna itan ti riknana sipud idi nagkappiada ken ni Obach.

Ngem saantayo a maliklikan ti agsaludsod. No saan ngata a naibando iti lubong ti inaramid ti padi idi nagpabuniag ti di nagkasar a babai, ken saan a rimkuas dagiti kritisismo kenkuana, nagpakawan ngata iti inaramidna a di maiparbeng nga aramiden ti maysa a pasurot ti Dios iti daytoy a pagilian a kakaisuna a Katoliko iti sibubukel nga Asia.?

Kasungani ti kinatan-ok nga imparangarang ni Pope Francis idi binuniaganna ti anak ti saan a nagkasar a couple iti maysa a seremonia iti Sistine Chapel iti Rome.

Ngem sakbay daytoy, indagdagadagen ni Pope Francis kadagiti papadi ti panangbautisarda kadagiti annak dagiti di nagkasar a babbai tapno mai-pasa ti nakristianuan a pammati.

Adda inyawag ni Pope Francis kadagiti papadi a dida kayat a buniagan dagiti annak dagiti di nagkasar a babbai: ipokrito.

Makunami ngarud: no kasta ti panagpampanunot ti maysa a padi a kas ken ni Fr. Obach a rumbeng koma a makaawat iti kasasaad ti di nagkasar nga ina, awan ti lugarna iti simbaan, awan ti karbenganna a mangiwaragawag iti pannursuro ti Dios.

Anagen koma dagiti padi a kas ken ni Fr. Obach dagiti imbalikas ni Pope Francis kalpasan a binuniaganna ti anak dagiti di nagkasar a couple: “Naaddaan dagiti nagannak kadakayo iti anak a lalaki wenno babai a mabuniagan, ngem iti sumagmamano a tawen, isudanto met iti maaddaan iti anak a mabuniagan, wenno apo…. Ket agtuloy ti kadena ti pammati.

Ania ti kayatna a sawen? Ibagak daytoy: dakayo ti mangipatulod iti pammati, dagiti agipatpatulod, addaankayo iti pagrebbengan a mangipasa iti pammati kadagitoy nga ubbing. Daytoy ti kapintasan a tawid nga ibatiyo kadakuada: ti pammati.”

Daytoy koma ti maipasagepsep iti panunot dagiti padi a kas ken ni Fr. Obach.#