EDITORIAL: Ania serserbi ti linteg no di met respetuen dagiti rinuker nga agtuturay?

Dimi ammo no anian ti nagbanagan ti proposal ni Sen. Miriam Defensor-Santiago a mangiwayat ti Senado iti inquiry mainaig iti ugali dagiti nabutosan nga opisial a panangbarikadada iti opisinada wenno panangsulbog kadagiti pasurotda nga agiwayat iti mass action tapno saanda a mapadisi wenno mapapanaw iti puestoda.

Sumagmamanon a daras a napasamak daytoy kadagiti eleksion wenno dagiti naduktalan a panagkunniber iti pondo ti gobierno.

Unaentayo ti eleksion no sadino a risiris ti panagbalubal dagiti kandidato ket bassit laeng a butos ti nagbaetan ti nangabak ken iti naabak. Iti daytoy a situasion, agkamang ti naabak a kandidato iti Commission on Elections para iti pannakabilang manen dagiti butos. Kadagiti dadduma, agsipud ta dida mapnek iti resulta ti panagprotestada iti Comelec, agkamangda iti korte.

Yan ti rigatna, no nangipaulogen ti korte iti pangngeddeng no asino ti pudpudno a nangabak, saan a maawat ti maysa ti pannakaabakna, lalo no nakatugawen agsipud ta naidardaras ti pannakaiproklamana. Kadawyan nga agbarikada iti opisinana, ditan nga aggian, mangan, maturog, ken ibaklayna dagiti pagrebbenganna uray iti baet nga adda pammilin ti korte a bakanteanna ti puestona.

Kabayatanna, reprep dagiti pasurotna ti agbarikada iti sanguanan ti pasdek, nakasagana a manglapped iti iseserrek ti grupo ti naiproklama a nangabak iti eleksion wenno dagiti mangiyimplementar iti pammilin. No saan nga agisin ti naabak a politiko, kapilitan nga agopisina ti nangabak iti dayta met laeng a pasdek a nagbarikadaan ti naabak.

Iti dayta a situasion, dua ti agtakem iti maymaysa a puesto. Ditoy ti pakatikawan dagiti umili ken empleado.

Sino ti surotenda? Sino ti pagpapirmaanda iti voucher, ken dadduma pay a dokumento para iti naannayas a panagtaray ti gobierno?

Nakitatayo daytoy di pannakaipangpangag iti linteg idi saan nga intaltalek ni Makati Mayor Jejomar Binay ti pammilin ti Ombudsman ket saan a pinalubosan dagiti pasurotna dagiti pannakabagi ti DILG a simrek iti Makati City Hall tapno ipaimada ti suspensionna.

Nakitatayo ti panagbarikada dagiti pasurot ni napadisi a Laguna Governor ER Ejercito iti baet a napudasdasan ti Comelec a sobra ti nagastona iti eleksion a nangabakanna idi a gobernador.
Nakitatayo ti panagsukir ni Cebu Governor Gwen Garcia a mangbakante iti puestona idi sinuspenso ti Malakaniang.

Ayonanmi ni Senadora Santiago a rumbeng a saan a maibarengbareng laeng daytoy a di panangitaltalek dagiti opisial a masuspenso wenno maikkat iti puesto iti linteg agsipud ta pakapsutenna dagiti maseknan nga otoridad ti gobierno a pakaibilangan ti Ombudsman, Civil Service Commission ken ti DILG.

No saan a maitaltalek daytoy, ad-adda laeng a tumured dagitoy nga opisial a mangtubngar iti pammilin dagiti otoridad iti ngato. Ania ti serserbi ti linteg no saan met a respetuen ken tungpalen dagiti abusado ken rinuker nga agtuturay?#