EDITORIAL: Anti-Trafficking Act: saan a maikaskaso?

Nagbalin a linteg ti Anti-Trafficking Act of 2003 idi 2003. babaen ti panagtitinnulong a panangikampania dagiti nadumaduma a grupo kas dagiti non-government organizations ken dagiti ahensia ti turay a kas ti National Commission on the Role of Filipino Women (NCRFW), Commission of Filipino Overseas, Department of Social Welfare and Development, Commission on Human Rights, Department of Foreign Affairs, Department of Labor and Employment ken ti National Anti-Poverty Commission.

Nagbalin daytoy a landmark measure agsipud ta pinagbalinna a kriminal ti Anti-Trafficking kas iti panagrekrut, panangiyalis, probision, panangsaluad, panangawat wenno panangipatulod kadagiti tattao para iti panggep a puersado a panagtrabaho, panangadipen, pananggundaway a seksual, saan a boluntario a panagserbi, pannakaitali iti utang, pisikal wenno sabali pay a kita ti panagabuso, panangikkat wenno panangilako kadagiti organo wenno pannakasolbar kadagiti naarmasan nga aktibidad wenno umasping a tignay.

Ta saan a malibak nga adu dagiti kaso dagiti magungundawayan a babbai ken ubbing, saan laeng nga iti uneg ti pagtaengan, iti pagtrabahuan, ken saan laeng a pisikal no di pay iti seksual a pannakaabuso.

Kaadduan kadagiti biktima ti silensio lattan a mangkimkim iti kinadaksanggasatda agsipud ta awan ti namnamaenda a mangsaluad, mangsalaknib ken mangirupir iti naabuso a kalinteganda kas tao.

Babaen daytoy a linteg, mapakatan iti pannusa dagiti agsalungasing manipud iti 20 a tawen a pannakabalud agingga iti tungpal biag a pannakabalud ken multa manipud P1 milion agingga iti P5 milion.

Malaksid dayta, mapakatan iti kadagsenan a pannusa dagiti aglabsing no maysa nga ubing ti biktima, natay wenno naakaran ti biktima iti Human Immunodeficiency Virus (HIV) wenno Acquired Immunodeficiency Syndrome (AIDS); wenno kabagian ti naglabsing ti biktima.

Iti biang dagiti biktima, maipaayan dagitoy iti proteksion ken rehabilitasion kas iti temporario a pagindegan, pannagibi ti salun-at, tulong a legal ken pammagbaga.

Ngem kapaliiwan nga adda latta dagiti mangabuso ken di mangipirpirit iti daytoy a linteg.Ā Ā  Apay? Maymaysa ti kayatna a sawen dayta: naturedda gapu ta adda nabileg a tattao a mangkunkunsintirĀ  kadakuada wenno tattao a mangprotprotektar kadakuada wenno nalukneng unay dagiti maseknan nga opisial a nakaipabaklayan iti pannakaipatungpal iti linteg.

Kasapulan ngarud ti naing-inget a panangipatungpal iti daytoy a linteg tapno madusa dagiti aglabsing, uray asino ti katataona! Ta agingga iti adda di mangipirpirit iti daytoy a linteg, adunto latta ti maabuso a kailiantayo. uray addada iti nababbaba a tukad ti panagbiag ken gimong, addaanda met iti kalintegan a maspul a respetaren di gundawayan. #