EDITORIAL: Apay a dida malekleksion?

Maysa manen a Filipina ti nasentensiaan a matay gapu iti drug trafficking sadiay Indonesia. Kas ninamnama, nagpatulong ti pamilia ni Mary Jane Fiesta Veloso iti gobiernotayo tapno maispal ken patay babaen iti firing squad iti baet mga imbasura ti Indonesian Supreme Court ti apelana idi Marso 26.

Napan ni Mary Jane iti Indonesia tapno agtrabaho a domestic worker ngem nadiskubre dagiti otoridad iti maletana ti 2.6 kilos a heroin.

Kuna ni Mary Jane a dina ammo nga adda naikabil a droga iti maletana. Ti kabagisna ti buniag ti masuspetsa a nangikabil kadagiti droga babaen ti pannakikumplotna iti drug sindicate.

Makipagriknakami iti agdama a sagsagabaen ti pamilia ni Mary Jane, ken maaramat koma amin a wagas ken pamuspusan tapno saan a maituloy ti pannakatayna babaen ti firing squad.

Ngem nainget ti linteg iti Indonesia mainaig iti drug trafficking. Daytoy ti pakaidumaanna iti pagiliantayo a nalukay ti lintegna mainaig iti panagipuslit iti droga.

Ket uray naggapela ti Migrante International, nalidem a maikkan iti klemensia ni Mary Jane.

Agpaay koma ngarud a leksion daytoy kadagiti kailiantayo tapno saanda paliwliw kadagiti sindikato ti droga gapu laeng iti sileng ti pirak nga ipabulsada.

Igunamgunammi pay ti madagdagus a pannakatiliw ti kabagis iti buniag ni Mary Jane tapno ikarona met iti pagbaludan ti panangirubona iti biktima.#