EDITORIAL : Apay Ngata?

Iti baet ti nainget a kampania ti kapolisan ditoy probinsia a mangpugipog iti panagraira dagiti illegal wenno kolorum a paltog, kapaliiwan a bassit ti magudilanda mainaig iti daytoy a problema.

Nakunami daytoy agsipud ta adu latta dagiti maireport ditoy probinsia a kaso ti pammaltog, matiliwan nga agikut iti paltog, wenno nagpaputok iti paltog.

Dakamatentayo dagiti sumaganad a report a naggapu kadagiti nadumaduma a police stations iti probinsia iti umuna nga uppat nga aldaw ti Oktubre.

Idi Oktubre 1, iti Sto. Domingo, Ilocos Sur, natay ti maysa a baket idinto a nasugatan ti kabsatna a lalaki gapu iti panangpaltog kadakuada ti kabsatda a lalaki a dati a Cafgu member. Susik iti daga ti mapapati a motibo ti pammaltog.

Iti daytoy met laeng nga aldaw, iti San Ildefonso, Ilocos Sur, nabartek ti maysa a mannalon ket naglaawlaaw, nagkarit ken impaputok ti paltogna a homemade a revolver.

Kasta met a pinaltogan ti di pay nabigbig a tao ti maysa a mannalon bayat ti panaglutona sadiay Cervantes, Ilocos Sur.

Idi Oktubre 2, tiniliw dagiti polis ti maysa a residente iti Barangay Raois, Vigan City gapu ta nagtagiarmas iti paltik a cal. 22 revolver idi sinublianna dagiti nakaririna a grupo dagiti lallaki.

Idi Oktubre 3, dua a nagkalubbon iti motorsiklo ti kinamat dagiti polis kalpasan a naireport dagitoy a nagisayangkat iti indiscriminate firing iti maysa a barangay iti Sinait, Ilocos Sur. Napilaanen ti kaso dagitoy dua.

Iti daytoy met laeng nga aldaw, iti met laeng Sinait, nasukalan dagiti polis ti maysa a mannalon nga adda paltog a cal .38 revolver a naikabil iti compartment ti motorsiklona.

Idi Oktubre 3 met laeng, pinaltogan ti maysa a mannalon ti kalugaranna bayat ti pannaturog daytoy iti maysa a kalapaw. Cal M16 rifle ti naaramat iti pammaltog.

Idi Oktubre 4, dua a lalaki a nagkalubbon iti motorsiklo ti kinamat dagiti polis ket mapapati nga adda paltog nga impalladaw ti maysa kadagiti naglugan iti kapagayan. Natiliw ti maysa ngem nakalibas ti kaduana. US carbine cal .30 M1 ti narekobre dagiti polis a paltog.

Umuna nga uppat nga aldaw pay laeng ti Oktubre. No kastoy laeng, ad-adunto pay ti matiliw wenno mapapatay babaen ti paltog.

Masaludsod: apay a kasla awan ti panagbutengen dagiti tattao nga agikut kadagiti kolorum a paltog idinto a nainget met ti kampania ti kapolisan maikontra kadagitoy illegal nga armas?

Saanen nga ipangpangag dagitoy dagiti mangay-aywan iti urnos ken talna iti probinsia?

Dayta ti kasapulan nga ipaayan dagiti police officers iti naun-uneg a panangamiris.#