EDITORIAL: Arbis iti barukong a natikagan iti ayat

NAMINSAN pay a napanek-nekan ti kinapudno ti pagsasao: No ania ti immulam, isu met la ti apitem.

Pammateg ti immula ti maysa a Filipina a nanny kadagiti ubbing nga inay-wananna idi nagtrabaho iti lima a tawen iti sidong ti maysa a pamilia sadiay Saudi Arabia ket gapu iti dayta, nasursuro nga impateg dagiti aywanna ken saanda a nali-patan dayta a panangipategna kadakuada isu a binirbirokda tapno makadenna ken maki-tada manen kalpasan ti naun-day a panawen a saanda a panagkikita.

Naammuan ti publiko daytoy makapikapik nga estoria ti panagpipinnateg idi nagpatulong ni Rawan Radwan, maysa a freelance reporter a nakabase iti Jeddah, Saudi Arabia, iti Quezon Public Information Office ken iti Manila Bulletin a kayatna a makita ken makadenna ni Marie Ning Bernardo, ti Pinay a yaya a nangtaraken kadakuada ken iti inaudi a kabsatna, ni Hadeel, manipud idi 1987 agingga iti 1992.

Iti imposte ni Radwan iti emailna, kinunana: “Nagbalin (ni Marie) a napateg a paset ti pamiliami.”

Kalpasan a naipablaak ti estoria iti Manila Bulletin, adu a tattao ti nalunag ti riknada iti daytoy a kalikagum ni Radwan a makadenna ni Marie Ning Bernardo, ket imbinglayda ti estoria iti Facebook a nagi-innallatiwan dagiti ginasut a ribu a likes ken positibo a reaksion a nagtungpal iti pannakabirokda iti nanny sadiay Candelaria, Quezon.

Agnaeden ni Marie, Marie Ning Bernardo-Bibit itan, iti Barangay Masalukot 2, Candelaria, Quezon ken bise presidente iti Violence Against Women and Children iti ili. Addan pamiliana ken maysa nga anak iti maikadua nga asawana.

Idi naammuan ni Marie Ning Bernardo ti panangbirbirok kenkuana ni Radwan, dina nasarkedan ti panagsangitna gapu ta dina ninamnama a malagip pay dagiti tinarakenna nga ubbing idi kanikaduapulo ket dua a tawenen ti napalabas.

Kinuna ni Marie a nagbalin metten a paset ti biagna ti pamilia ni Radwan ket dina malipatan ida gapu iti kina-imbagda kenkuana bayat ti panagpaayna a yaya kadagiti ubbing.

Iti pannakaisurat daytoy, planplanuenen da Radwan ti kasayaatan a tiempo a panag-biahena nga agpa-Filipinas tapno maarakupda manen ti yayada.

Ngem kadakami, adtoy ti estoria ti panagpipinnateg iti labes ti panaggidiat ti kultura ken agpang iti biag ti maysa a nanny ken ti pagserbianna a pamilia.
Kayarigan daytoy iti arbis iti natikagan a barukong a natiltil kadagiti rituer ti kinama-nagimbubukod, pannaka-pukawen ti talentalek, saanen a panagkakatunosan gapu iti panagsusupadi iti ideolohea, panirigan, polisia ken prin-sipio.

Napatalgedan ti pammati nga adu latta ti masarakan a kas ken ni Yaya Marie Ning Bernardo-Bibit ken Rawan Radwan a simbolo ti panag-pipinnateg iti daytoy nariribuk a lubong.#