EDITORIAL: Atiddog ti ima ti linteg

Sangapulo a tawen a binirbirok ti Estados Unidos ni Osama Bin Laden tapno sungbatanna dagiti rinibribu a napasag iti pannakabomba ti World Trade Center ti New York idi Septiembre 11, 2001 a maibilang a maysa a disnog iti rupa ti kabilgan a pagilian iti sangalubongan.

Sangapulo a tawen nga inanusan ti Estados Unidos ti nagurnong kadagiti intelligence reports babaen dagiti nadumaduma a national security agencies tapno maitudo, mabigbig ken masiputan dagiti mapattapatta nga asideg, talken ken pannakaima ni Bin Laden a nagpukaw a kasla asuk kalpasan ti pannakabomba ti New York.

Ngem kastay kunadan, uray kasano kaginad man wenno makaupay ti atiddog panagimbestiga, dumtengto ti tiempo nga agsisilpo dagiti ebidensia ket maipatungpal ti hustisia.

Dimteng dayta a kanito idi natakuatan ti kinasiasino ti courier a talken unay ni Bin Laden. Nasipsiputan dagiti garaw ti nasao a courier agingga iti naduktalan babaen ti intelligence network ti lugar a pagdakdakiwasan ken paggas-assisawan daytoy agingga iti naitudoda ti maysa a lugar iti ikub ti Pakistan a nakaipatakderan ti maysa a pagtaengan a naisalsalumina kadagiti asideg a kaarrubana a balbalay agsipud iti kinalawana unay, kinangato dagiti didingna ken kinainget ti seguridadna.

Ket idi Abril 30, kalpasan ti adu a panagmimiting iti nagbaetan ni Pres. Obama ken dagiti opisial ti NSA, imbilin ti presidente ti pannakaraut ti nasao a pagtaengan babaen dagiti napili a kameng ti Navy Seals.

Sekreto unay daytoy nga operasion ket sumagmamano laeng nga agtuturay ti makaammo ken saan a naipakauna iti gobierno iti Pakistan agsipud iti amak ti Estados Unidos a mapakdaaran ti numero uno a terorista a  puntiria ti operasion.

Naisayangkat ti operasion iti las-ud laeng ti 40 a minutos ket idi nagpukaw ti asuk ti rinnupak, natateken iti bala ni Bin Laden. Intapuak dagiti rimmaut ti bangkayna iti baybay tapno saan a maaramat dagiti pasurotna a pangrubrob iti beggang a posible a maparnuay iti pannakagudasna iti operasion.

Iti pannakatay ni Bin Laden, makaanges iti nalukay ti sangalubongan ta maysa a dakkel a siit ti naikkat iti karabukob dagiti managayat iti kappia.

Iti ipapatay ni Bin Laden, adda la ketdi sumukat kenkuana. Ngem iti pannakapapatayna, agbalin daytoy a pakdaar kadagiti terorista a saan a matmaturog ti hustisia; sadino man ti pagkamangan ken paglemmenganda, kamatento ida ti ima ti linteg tapno ikaroda ti naaramidda a kinadangkok kadagiti awan gawayna a tattao.#