EDITORIAL: Awan lugar abusado a traysikelan iti Vigan City

Kas ninamnama, dupudop dagiti turista, lokal man wenno ganggannaet, a nagpasiar ditoy Siudad ti Vigan itay Semana Santa. Mariknan ti resulta iti pannakapili ti Vigan City a maysa kadagiti pito a pagsiddaawan a siudad iti sangalubongan idi Disiembre 7 itay napan a tawen.

Nakitan ti isusuyop ti bilang dagiti turista a simmarungkar iti Vigan idi sinelebraran ti Simbaan ti Konbersion ni San Pablo a paset met ti panangrambak ti Vigan City iti panagbalinna a siudad a naratipikaran babaen iti aglaplapusanan a butos dagiti umili ditoy idi 2001.

Kinapudnona, sagsaganaanen dagiti agtuturay ti Vigan ti kadakkelan a selebrasion iti pakasaritaan ti siudad, ti pannakaideklara ti Vigan City a maysa iti New7Wonders Cities of the World inton Mayo 7 daytoy a tawen. Manamnama a tumabuno iti selebrasion dagiti nangangato nga agtuturay iti pagilian nga idauluan ni Presidente Benigno Aquino III ken dadakkel a personalidad iti kagimongan.

Iti biang dagiti agtuturay ti Vigan, manamnama nga aramidenda amin a kabaelanda tapno agballigi ti selebrasion. Iti kallabes, nakitatayon no kasano ti panangakay ni Mayor Eva Marie S. Medina iti Vigan iti panagdaliasatna manipud iti maysa nga ordinario nga ili agingga iti panagbalinna a maysa itan kadagiti kangrunaan a destinasion, saan laeng iti Amianan a Luzon no di pay iti intero a pagilian. Dakkel ti panagtalektayo a babaen ti lideratona, napintasto ti imahe ti Vigan City nga ipadanon dagiti sangaili ken turista iti naggapuanda a siudad ken nasion ket agbalinda a pannakangiwat iti napintas a kapadasanda iti kaaddada ditoy siudad.

Ngem saan a maigawid ti isisiplot dagiti pampanunot iti sanguanan iti daytoy kadakkelan a selebrasion iti historia ti Vigan. Manamnama kadi met ti pumada a talek ken kumpiansa kadagiti nadumaduma a sektor para iti awan maidillaw a panagserbi kadagiti umay ditoy siudadtayo inton Mayo 7?

Pagarigan ti sektor ti transportasion. Kasapulan ti naing-inget a disiplina iti daytoy a sektor, nangruna kadagiti traysikelan nga agpaspasada iti uneg ti siudad. Apay a makunami daytoy? Ngamin, adu pay kadagiti agpaspasada ditoy ti abusado, mananggundaway ken awan panangipirpirit iti kalintegan kadagiti pasaheroda uray iti baet ti masansan a pammallakad manipud kadagiti dadauluenda.

Pagarigan laengen iti kalsada iti sango ti Vigan City Convention Center, nagbalinen a kasla highway a pagassisawan dagiti ingget pegges ti panagpatarayda a traysikel ken dadduma pay a lugan. Uray no adda kumperensia wenno seminar iti convention center ket aggaarimutong dagiti sangaili wenno delegado iti sango, nataray latta dagiti lugan ket no awanen ti guardia a mapusgan a mangkita iti trapiko, aggiinnunada nga agala kadagiti sangaili nga agsubli iti otelda wenno mapan agpasiar iti puseg ti siudad. Adda pay sumagmamano a drayber a mangsitsit lattan kadagiti pasahero a kunam la no aso, wenno mangbusina kadakuada tapno maalada ti atensionda. Adda pay nakitami a dua a nataengan a panggepda ti agballasiw a mapan iti otel ngem agkarasanudda agsipud ta saan nga agmenor wenno agsardeng biit dagiti abusado a drayber tapno lumasatda. Iti kastoy a situasion, no adda koma disiplina dagiti drayber iti traysikel, saanen a kasapulan pay ti traffic aide a mangimaton iti trapiko.

Kadaksan unay ti panagsingir dagiti abusado a traysikelan iti sobra a plete kadagiti sangsangaili a pasaheroda.

Wen, ad-adu pay laeng dagiti disente ken makadios nga agpaspasada kas pinaneknekan ti pannakaisubli ti selpon ken gold belt ti dua a delegado iti kombension ti Knights of Rizal. Ngem dagiti sumagmamano nga abusado a traysikelan ti kaarig nalungsot a kamatis a mangpabungsot met iti nadalus nga imahe ti ad-adu a bilang. Dagitoy rinuker a sumagmamano ti saan koma a maipalubos nga agpasada tapno dida mansaan ti napintas nga imahe ti Vigan City iti imatang dagiti rinibribu a manamnama nga agpallailang ditoy nangruna inton Mayo 7 a pannakaideklarana a maysa a New7Wonders Cities of the World.

Saan a kasapulan ti Vigan dagiti abusado a tricycle drivers. Rumbeng ngarud a polisiaen dagiti dadaulo daytoy a sektor dagiti kamkamengna tapno saanda nga ibabain dagiti managtungpal iti linteg a kabaddungalanda.#