EDITORIAL: Ayan-ayat iti let-ang ti nababa a moralidad ken materialismo a kagimongan

Itay nabiit, nabasami ti panagkallaysa ti dua a tinedier iti maysa nga ospital iti Birmingham. Maysakami kadagiti rinibribu a tattao a natignay ti riknana iti daytoy a panagkallaysa da Omar Al Shaikh ken ni Amie Cresswell, agpada a 16, agsipud ta nagbalinda a maymaysa iti matrimonio bayat nga umar-arubayan ni patay.

Wen, agsakit iti leukemia ni Omar, ti nobio, ket aldaw laengen ti palabsenna ditoy a biag. Ngem idi kiniddaw ti lalaki iti nobiana ti panagkasarda, immannugot ti babai iti baet nga ammona a sumina ti patpatgenna iti mabiit.

Inted met dagiti nagannakda ti pammalubos nga agkallaysada gapu iti awan panaginkukuna a panagayat da Omar ken Amie iti tunggal maysa.

Kasla masirsirmatami ti buya iti uneg ti ospital: dagiti nagannak ken dagiti agarup 20 a gagayyemda a mangtiptiped ti panagluada bayat ti pannakaannong ti kallaysa, aglalo idi inkarkarigatan ni Omar ti tumakder iti wheel chair tapno isuotna iti ramay ni Amie ti inaramidna a singsing manipud iti sabong.

Wen, asino koma a parsua ti makalapped iti panagtinnag ti luana iti pannakaimatangda iti naisangsangayan a kinaragsak dagiti kakaskasar iti baet a daytoy a panagtiponda iti salinong ti matrimonio ket geppasen ni patay?

Iti dayta a rabii, nangiyuneg pay dagiti nars iti sabali a katre tapno kaduaen ni Amie a maturog ti asawana.

Maymaysa ti pagadalan ti da Omar ken Amie ket ditoy a nabukel ti panaggayyemda. Ngem natakuatan nga adda leukemia ni Omar idi Hunio idi napan a tawen kalpasan a napukawna ti puotna bayat ti panagay-ayamna iti football. Iti pannakayospitalna, binisbisita ni Amie.

Idi arintapusen ti Oktubre, kuna dagiti doktor a naparmek ni Omar ti sakitna ket iti panangrambakna iti maika-16 a kasangayna, nasangal metten ti ayan-ayatda ken ni Amie.

Idi Marso daytoy a tawen, naduktalan a nagsubli ti sakit ni Omar, ket iti panaggianna iti ospital, rinabii a bisitaen ni Amie.

Manipud idi nagkallaysada, rinabii ni Amie iti sidong ti asawana, mangig-iggem iti dakulap ni Omar kas pammatibker ken pammategna agingga iti pimmusay.

Nakuna ni Mirabela, ina ni Omar: “Ay-ayatenda unay unay ti tunggal maysa. Napukawko ni Omar ngem naaddaannak iti best daughter-in-law iti sangalubongan.”

Kalpasan ti ipapatay ni Omar, binaliwan metten ni Amie ti apelyedona iti Facebook. Kinuna ni Amie: Espesial a momento kaniak daytoy. Diakto malipatan ni Omar. Isu ti aminko.”

Anian nga ayan-ayat. Dagiti kastoy a panagpipinnateg ti kasapulan ti lubong iti daytoy a panawen ti komersialismo, materialismo ken panagraira ti nababan a moralidad iti kagimongan.#