EDITORIAL: Ayat ken kappia ti kaipapanan ti Paskua

PASKUA manen. Dimteng manen ti panawen a panagkaykaysa ti sibubukel a sangkataoan para iti maymaysa a panggep, maymaysa a tignay, maymaysa a rikna,  maymaysa a pannakigamulo iti ibibileg ti ayat, ken kappia.

Ta ayat ken kappia ti kangrunaan ti amin. Dagitoy ti ubbog ti kinaasino no apay a naiparsua ti tao. Ket iti panagsaknap ti ayat ken kappia, dayta metten ti pannakariknatayo iti talna wenno talinaay. Daytoy ti  tartarigagayantayo amin.

Ti Paskua ket saan laeng a panawen ti ragragsak no di ket kangrunaanna iti amin, ti panagyamantayo iti Namarsua iti nabuslon a parabur nga imburayna kadatayo. Saantayo laeng a lagipen ken selebraran ti pannakaiyanak ni Jesus no di luktantayo pay ti barukongtayo tapno sumrek ni ayat ken kappia. Iti kasta, iti isusungad ti baro a tawen, sumrek met kadatayo ti nabuslon a grasia ken bendision.

Saan a pagduaduaan ti kinaragsak ti lubong no dumteng ti kastoy a panawen. Uray dagiti saan a Kristiano, makariknada iti naisangsangayan a kinaragsak ket makipagragsakda met kadatayo a Kristiano.  Nupay adda dagiti dadduma a relihion iti uneg ti Kristianismo a di mamati unay itoy a pasken ken mangontra iti kinarangya ti pannakaselebrarna, makipagragsakda ken makipasetda iti daytoy a pagteng. Adda  panagkaykaysa ken pannakikaykaysa ti amin.

Agnanayon koma nga agtalinaed ken agtaeng kadagiti amin a puso ti ayat ken kappia a patauden ti panangselebrartayo manen iti pannakaiyanak ni Apo Jesus. Makipagragsaktayo iti irarangpayana.

Nupay kasta, liklikantayo koma ti kinalabes la unay a ragragsak a masansan a mangiyadayo kadatayo iti napudpudno a kaipapanan ti selebrasion. Liklikantayo koma ti komersialismo. Ta iti panaggandattayo a mangsurot ti taray ti kabaruanan a panagbiag, malipatantayo no apay nga adda selebrarantayo a pagteng.  No agtinnag a kasta, adda tendensiana a malipatatantayo nga iti naminsan, adda  naipasngay iti kulluong a nangsubbot iti basbasol ti lubong.  Iti pannakaipasngayna, maipasngaytayo koma met para iti natibtibker pay a baro a pammati iti baro a biag.

Saantayo koma met a liplipatan ti kinaadda dagiti sabali a parsua a gumawgawawa ditoy lubong. Idiayatayo ketdi ti ukrad a dakulap ken takiagtayo tapno maipariknatayo met kadakuada nga agkakabsattayo, agmaymaysatayo, iti nagan ti ayat ken kappia ken iti imatang ti Ari dagiti Ari.

Wen, nagpaiduma daytoy a pagteng. Maluktan koma amin nga isip ken rikna ti tao tapno agmaymaysada a mangpasangbay iti Mesias.#