EDITORIAL: Baro a tawen, panangabaruanan

Panangabaruanan ti kangrunaan a kaipapanan ti panangpasangbaytayo ken panangsarabo a naannayas ti kabarbaro a tawen. Mangabaruanan a kas iti napabaro a gannuat a sumango a  sipipinget iti dangadang ti biag.

Kasapulan ti mapabaro a namnama iti tunggal gannuat. Ket itoy nga idadateng ti baro a tawen, nasken a mapabaro ti kinaasino, saan laeng nga iti isip ken panggep no di ket karaman ti ibubunga ti puso iti nagpaiduma a kaipapanan.

No intay lagipen iti napalabas wenno naglabas a tawen ken usigen a nalaing ti nagdalanantayo, maamiristayo a saan laeng a ti tawen ti nasken nga agpabaro wenno mangabaruanan no di uray datayo a mismo a tao. Usigentayo koma a nalaing dagiti aramid, tignay ken panggeptayo. Pagdadasigentayo ti kinapategda tapno maamiristayo a nalaing dagiti nasken nga idianan wenno isardengtayo.

Amirisentayo a nalaing dagiti nagkamtudan, nagliwayan ken kadagiti nagbiddutantayo. Amirisentayo dagiti awan kaes-eskanna a banag a timmaud wenno pinataudtayo wenno pinarnuaytayo para iti awan kaitutopanna nga addang. Amirisentayo dagiti intungtungkuatayo wenno intantantayo nga idi agangay ket nabaybay-antayo wenno saantayon nga inkaskaso. Ket manipud kadagitoy, ammuentayo ti kapkapnekantayo a piduten para iti sabali manen a bulig ti namnama ken dur-as. Ta ti mangabaruanan ket pannakaipasngay ti baro a namnama.

Ngarud, pasantakentayo ti baro a namnama itoy a kabarbaro a tawen. Idiantayo koma dagiti pampanunot a mangipaay iti tubeng iti kapkapnekan a dur-as, dagiti aramid a maikanniwas iti kinatalinaay ken dagiti panggep a mangiduron iti asinoman a kumammet iti saan a nasayaat nga addang.

Panunotentayo ti amin lalo ti masakbayan. Napateg la unay ti masakbayan ta dayta ti rason no apay nga addatayo nga agdaldaliasat ken makidangdangadang iti biag. Pasantakentayo ti baro a namnama a mangiburay kadatayo iti pigsa ken saldet. Ti namnama nga awan ti karagpinna a panagbuteng iti masungadan a dugudog ken sumangbay a sipnget no di ket ti panagtaeng koma kadatayo ti kinasaldet ken kinapinget ken kinaandur iti panagdaliasat iti biag. Dayta ti tartarigagayan ti amin.

Ta dagiti amin a nagtaud iti daytoy a lubong ket mabati iti daytoy met laeng a lubong. Awan ti maitugot iti ‘papanan’ iti ungto wenno ngudo ti dalan. No aniaka a simmangbay isu met laeng ti kinaaniam a pumanaw. Ngem agtalinaed ti raniag ti intukitmo a nagan. Dayta ti pakalaglagipan dagiti panawam ken wanawan dagiti mayat nga agurnong kadagiti intukitmo a bukel ti kinaasino.

Iti daytoy a panangpalubostayo iti nalakayanen a tawen, palubosantayo met ti daan a kinaasinotayo. Ket iti panangpasangbaytayo iti ubing a tawen, pasangbayentayo met ti kabarbaro a talged ti kaimudingan. Pabaruentayo manen ti rikna. Pabaruentayo manen ti kinatao ken kinaasino iti imatang ti sabali, lalona unay iti imatang ti Mannakabalin.

Ragsak ken dur-as koma ti agari kadagiti amin a puso iti panangpasangbaytayo ti baro a tawen!#